amalinks wokungena

Breaking News

Izisebenzi zeZimbabwe Zimanyana Lezinye Emhlabeni Jikelele Ukunanza iMay Day


ZCTU

Izisebenzi zeZimbabwe zimanyana lezinye umhlaba wonke jikelele ukunanza usuku oluqakathekisa umsebenzi wazo eleMay Day ngoLwesihlanu ngokudana okukhulu ngoba lokhe zigunyulwa, amankampani evala ekhala ngesimo somnotho.

Umkhosi wokunanza leli langa eHarare wenzelwe enkundleni yeGwanzura Stadium njalo uqoqwe ngabenhlanganiso emela izisebenzi eye Zimbabwe Congress of Trade Unions.

Umkhokheli wenhlanganiso le, umnumzana George Nkiwane utshele uzulu ukuba kuzamele abophe ziqine ngoba lokhe siqhubeka sisiba sibi isimo somnotho elizweni, kungekho okwenziwa nguhulumende weZanu PF ukuzama ukusilungisisa.

UNkiwane wengeze ethi uhulumende akumelanga avunyelwe ukuqhubeka ngenguquko kwezemithetho yezisebenzi.

Unobhala jikelele weZCTU, umnumzana Japhet Moyo, uthi kuyinto edanisayo ukuba lokhe lincipha inani lezisebenzi eZimbabwe lanxa uhulumende wathembisa uzulu ukuba uzasungula imisebenzi eyedlula izigidi ezimbili – 2,2 million.

Wathi uMoyo kunje lolusuku lunanzwa ngesikhathi izisebenzi zibhekane lobunzima obuphindwe kabili, amankampani evala nsuku zonke, inengi sekungabaphila ngokuthengisa impahla etshiyeneyo, uhulumende engakutshayi ndiva.

Usole kakhulu lokho osekusenzakala, uhulumende eqhubeka evala amankampani anjenge kamakhalekhukhwini eye Telecel Zimbabwe, okubonisa ukuba akazinikelanga ukuthuthukisa umnotho welizwe.

Umnumzana Maverlous Khumalo okhokhela inhlanganiso yezakhamizi eye Chitungwiza Residence Association obe khona emkhosini wezisebenzi walamhla, laye utshengise ukukhathazeka phezu kwesimo somnotho welizwe.

Bezikhona njalo inkokheli zamabandla ezombusazwe aphikisayo okubalisa ele MDC-T, umnumzana Morgan Tsvangirayi kanye lowe Mavambo/Kusile/Dawn umnumzana Simba Makoni. Ababili laba bathi umumo wezenoto yiwo osubangele ukubaleka kwezizalwane zakuleli ukuya kwamanye amazwe zisiyadinga okungazisiza ukuziphilisa esezifika khonale zidibana lobunye ubunzima bodlakela lweXenophobia lezinye inhlupho.

Umkhosi wezisebenzi lonyaka unanzwa phansi kwendikimba ethi “Workers under Siege, Arise and Fight On.

XS
SM
MD
LG