Izisebenzi zikahulumende ezihole ngoLwesibili zidane okwamagama ngokungatholi iholo elikhuphukileyo njengalokho ezakuthenjiswa nguMongameli Robert Mugabe owathi ngomabasa uzasebenza gadalala ukuthi izisebenzi lezi zithole iholo elingcono ngonhlangula.
Ababalisi abakhulume le Studio 7 bathi inengi labo libuyele emsebenzini selithole iholo okungafani lesikhathi esidlulileyo lapho ababezihambela ngekhaya nxa bengatholanga abakufunayo sokusele ilanga elilodwa lokuthi bakhalale umsebenzi.
Bathi kabasoze bakhalale imsebenzi njengoba belakho ukungatholi imali abayiphiwa yizikolo ebakhanga ukuthi babe ledlabuzane lokusebenza.
Imali le iyatshiyana njengoba ababalisi bethola amatshumi amane amadola kusiya kumakhulu amabili eMelika.
Umbalisi ose Harare ongafunanga ukuqanjwa ngegama uthe inengi lababalisi kalisoze likhalale umsebenzi ngoLwesithathu njengalokho okukhuthazwa yi Progressive Teachers Union of Zimbabwe.
Omunye njalo umbalisi osedolobheni lako Bulawayo uthi ukulwa kwenhlanganiso zababalisi kuzakwenza ukuthi izisebenzi zikahulumende zingaphiwa iholo elingcono.
