Izisebenzi zikahulumende zithi lamuhla zithole iholo elikhuphukileyo okukhanya lingezelelwe ngemali etholwe ekwenjiweni kwamadayimana eMarange.
Umphathintambo wezemali uMnu. Tendai Biti ubesithi izisebenzi azisoze zengezelelwe iholo ngoba uhulumende engelamali.
Izisebenzi ezinengi zithi iholo lazo lingezelelwe phose ngekhulu lamadola eMelika sokuhlangene lemali yokuthelela izindlu, ihousing allowance, leyokugada zisiya emsebenzini itransport allowance.
Umphathintambo wezemigodi uMnu. Obert Mpofu utshele iStudio 7 ukuthi imali esetshenziswe ukukhuphula iholo lezisebenzi zikahulumende ivele kumadayimana eMarange.
Umqondisi we Zimbabwe Teachers Association uMnu. Sifiso Ndlovu uthi bekuvele kusobala ukuthi uhulumende uzakhuphula iholo lezisebenzi loba kungela mali.
Kodwa-ke umbalisi wako Bulawayo owale ukuthi siqambe igama lakhe uthi imali le incane kakhulu.
