Ababeyizisebenzi zeNRZ abedlula ikhulu ngoLwesibili bavinjwe ngamapholisa kaLoliwe ukuyakhulumisana lomqondisi wenkampani le mayelana leholo lemali zepentsheni abalokhe bengakazitholi lokhe batshiya umsebenzi.
Obona ngokuqhatshwa kwezisebenzi, uNkosikazi Grace Kunda ocine ebizwa ukuzebhula umlilo, ubatshele ukuba uMnu. Lewis Mukwada umqondisi wale inkampani ubephathekile ngeminye imisebenzi nhakhoke uzathola ithuba lokukhulumisana labo ngoLwesihlanu.
Izisebenzi zeNRZ sezabumba inhlanganiso ebamelayo kulolu daba eyeAssociation of Railways Terminated Employees. Unobhala wayo, uMnu. Ronald Kuvarega, uthi abe NRZ abasafuni khona ukukhuluma labo ngemali yabo njalo akukacaci ukuthi umuntu lomuntu umele athole malini.
Ababeyizisebenzi zikaloliwe bagoqela abantu abamiswa umsebenzi ngokugula, ngokukhula, ngokuzikhethela kunye lababanjwa ngamandla ukutshiya umsebenzi.
Bonke lababantu bakhala ngemali yabo abangayinikwanga.
UMnu. David Mathe, omunye walababantu, uthi ubuhlungu ngoba wamiswa umsebenzi ngesikhathi egula ngoNtulikazi womnyaka odluleyo.
Umnu. Ndodana Nyoni laye uthe wamiswa umsebenzi ngesikhathi egula njalo kakaze athole ngitsho mali lokhe wamiswa umsebenzi.
Umnu. Fainos Ncube, owamiswa umsebenzi eseleminyaka engamatshumi ayisithupha ekhangelele ukuthatha impentsheni laye lokhe elinde eyakhe imali.
Inkampani yeNRZ njengawo wonke amankampani kahulumende ibhazalele ngesisu ikhangelele ukuthola usizo lwemali ukuze ivuke kodwa akucaci njalo labasebenzayo okwamanje abalitholi iholo.
Amankampani amanengi eZimbabwe adonsa nzima ngenxa yomumo womnotho welizwe onzima njalo izisebenzi ezinengi azisazi ukuba zihola malini loba nini ngoba inqe imali abayiphiweyo bayamukela.
