Amadoda ayisithupha asebenzela inkampani yeGushungo Holdings eka Nkosikazi Grace Mugabe umkaMongameli Robert Mugabe abikwa ethekelele isigodlo senkampani yeNestle Zimbabwe ngolweSine eHarare lapho afike agila imikhuba esithi inkampani le kumele iqalise ukuthatha uchago oluvela eGushungo Holdings.
Amadoda la abikwa efike akhwaza athi afuna ukubona umqondisi weNestle uMnumzana Heath Tilley lo Finance Director uMnumzana Farai Munetsi.
Abakwazi okwenzakalayo bathi kucine kusenziwa umhlangano wenkokheli yeNestle Zimbabwe lamadoda la loba nje kungaziwa ukuthi kuphumeni kulezinkulumo.
Amadoda la abikwa etshele uMnu. Tilley lo Mnu. Munetsi ukuthi uNkosikazi Mugabe kachelesanga ngesinqumo esithethwe yinkampani yeNestle ngoMpandula lonyaka ukuthi ayisekuthatha uchago oluvela eGushungo Holdings ngakho-ke sokumele linkampani iqalise ukwamukela uchago lweGushungo Holdings. Inkokheli yeNestle Zimbabwe iphinde yaxwayiswa yilamadoda ukuthi umqondisi omutsha walinkampani odinga amaphepha okusebenza eZimbabwe avela kuhulumende kasoze awathole nxa belokhe bengavumi ukuthatha uchago oluvele epulazini lika Nkosikazi Mugabe.
Isinqumo sokungathathi uchago oluvela eGushungo Holdings senziwe ngemva kokukhonona kwabantu abakhangelane lokulondolwa kwamalungelo olunto abathi ipulazi lika Nkosikazi Mugabe lathathelwa omhlophe ngobudlwangudlwangu.
UMnumzana Rejoice Ngwenya ingcwethi ecubungula ezombusazwe le zenotho utshele uGibbs Dube weStudio 7 ukuthi izenzo zeGushungo Holdings yikwethusela okumele kuyemangalelwa edale lemthethwandaba kusetshenziswe umthetho we Companies Act ongavumeli ukuhlukuluzwa kwamankampani.
