IBotswana ithi inani labeZimbabwe ababotshelwa ukuthola izithupha zakulelozwe ngundlu liqhubeka liqonga. Lokhu kulandela ukugwetshwa kabahlanu ensukwini ezisanda ukwedlula, ngenxa yokutholakala belezithupha zeBotswana okungekho emthethweni.
Ngesikhathi umumo womnotho kweleZimbabwe uqhubeka usiba munyu, inengi liqinisa imizamo yokudinga indlela zokuphunyuka kulelijogwe noma nje ezinye zingekho emthethweni.
Abanye abeZimbabwe kweleBotswana sebebone kungcono ukuzama ukudinga amaphepha alelolizwe ngundlu ukuze bamukelwe njengezizalwane zeBotswana.
Ensukwini ezisanda kwedlula, kulabahlanu abagwetshelwe ukutholakala belezithupha zeBotswana okungekho emthethweni.
Batshele umthethwandaba ukuthi babanjezelwe yisimo esibi eZimbabwe yikho bedinga ukuphephela kweleBotswana.
Abakhulume leStudio 7 bathi lokhu kumgceke ukuthi isimo seZimbabwe yiso esifuqela inengi ukuthi lizithole zisesimeni lokufulathela umbuso kamongameli Robert Mugabe…
Umnumzana Vulindlela Sibanda uthi lokhu okwenzakalayo kumele kuyangise umbuso kamongameli Robert Mugabe ngoba kumgceke ukuthi abantu bazimisele ukuzigeza ukuba ngabeZimbabwe.
Umnumzana Ozias Ngulube laye uyabavikela labo abazithola belingeka ukuthola izithupha zeBotswana ngomkoto. Uthi kusobala ukuthi amazwe angomakhelwane afana leBotswana leSouth Africa aphethe amathuba ekusasa engcono uma kuqathaniswa leZimbabwe.
OweBotswana uBoitumelo Pinielo uthi noma nje ezwela labo abeZimbabwe, ukudala amacala akusoke kusize ngalutho. Uthi ngabe uhulumende wakhe ulandela inyathela leSouth Africa lokunikeza labo abangalamaphepha ixetsha lokulungisa isimo sabo.
Kubikwa ukulungiselwa izithupha ngundlu sokulibhizimusi elikhulayo njalo ligoqela lezizalwane zeBotswana okuyizo eziphambili ekusizeni abafuna lezizithupha.
Inhlawulo yokuthola isithupha seBotswana ngomkoto ibikwa iqala kumapula ayinkulungwane ezilitshumi isiya phezulu, okunganga madola aweMelika ayinkulungwane.
