Izizalwane ezimbili ze Israel ekade zithwele amadayimana eMarange zibikwa zibotshwe ngoLwesithathu ngamapholisa akulelolizwe zisanda kwehla indizamtshina eTel Aviv Airport.
Omele isikhulumeli se Kimberley Process Certification Scheme uMnu. Stokamer Amir utshele iStudio 7 ukuthi uMnu. David Vardi lo Mnu. Gilad Halachmi badojwe ngamapholisa batholakale bethwele amadayimana alentengo engaba zinkulungwane ezingamakhulu amabili zamadola eMelika.
Umnu. Amir uthi amapholisa eIsrael ahluze loludaba njalo uMnu. Vardi ubikwa sexotshiwe yinhlanganiso ye Israel Diamond Exchange lapho akade ebhalise khona ukuthi athenge njalo athengise amadayimana.
Ingcwethi kwezenotho lezombusazwe uMnu. Walter Nsununguli Mbongolwane uthi ukubotshwa kwalamadoda kutshengisa ukuthi ukutshontshwa kwamadayimana eMarange kuyamemetheka.
