amalinks wokungena

Breaking News

Izizalwane zeZimbabwe Ezivela eSouth Africa Zehluleka Ukungena eBeitbridge


Kugcwele izimota emngcweleni weZimbabwe leSouth Africa kulabantu abanengi abaya kwele Zimbabwe.

Ukuminyana okukhulu kwezimota labantu abalubhekise eZimbabwe emngceleni weBeitbridge sokulethe ukudana okukhulu kwabanengi asebedlalela iKhisimusi endleleni belokhu bezama ukuphuma kwele South Africa.

Lamhlanje ekuseni izimota zabe Zimbabwe abalokhu bengakaphumi emngceleni bezilokhu zifole okwamakhilomitha amanengi.

Bafice imbila zithutha emngceleni weBeitbridge abeZimbabwe abebecabange ukuthi nxa bengahamba sekungensuku zatshwala ukuthi kufike usuku lwe Khisimusi bazadlula bentantalaza.

Imizila yezimota lamhlanje empondozankomo ibilokhu isedlula amakhilomitha amane. Abanye besebesiyaqeda phose amalanga amabili imota zilokhu zithe khwimilili emngceleni zithi nxa zihamba zitshede ngesiqubu sonwabu.

Isizalwane seZimbabwe esiziveze ngokuthi nguMnumnzana Ngwenya wakoBhidi, eKezi, utshele iStudio ukuthi bakhathazekile njengoba imuli zabo zizakudla ingqweqwe zomlomo ngeKhisimusi bona belokhu bethe kho emngceleni lamakhumukhumu.

Abanye abantu abehluleka ukuchapha umngcele edolobheni leBeitbridge.
Abanye abantu abehluleka ukuchapha umngcele edolobheni leBeitbridge.

“Sifike izolo ngo 3 emini salala lapho. Khathesi khona singena eborder yaseZimbabwe kusuka izolo ngo 3. Nakho khonalapha ngithole abanye. Isimo salapha asikho sihle, amaroli lawa, imota ezilayitshayo, imota ezincane zonke lezo kuhlangene.”

Esinye isizalwane seZimbabwe, uMnumnzana Washy Mabizela, ufike emngceleni ngehola lesitshiyagalolunye izolo ntambama kwaze kwatshaya ihola lesithupha ekuseni lamhlanje belokhu besemzileni.

“Kuyabhora lokhu. Sasicabanga ukuthi sizadlala iChristmas labantwana manje iChristmas yakhona igcine iphelela la sisendleleni ngendaba yokuthi kugcwele kakhulu eborder. Uthole ukuthi impahla zabantwana zonke zisasekhona la. Abantwana bazokwata kakhulu njengoba ilanga lakhona selifikile impahla zingakafiki.”

Abahamba ngemota zabo yibo abathwele amagabha avuza kakhulu njengoba kusizwa kuqala abahamba ngamabhasi.

Abanye bethesa izisebenzi zogatsha lwendaba zasekhaya umlandu wokwehluleka ukwenza amalungiselelo apheleleyo. Kodwa lolugatsha luthi lokhu kubangelwe linani labantu abedlula amalawulo abaphume sekusiyafika ilanga leKhisimusi.

Emadabukakusa ngosuku lweKhisimusi.
Emadabukakusa ngosuku lweKhisimusi.

Umgcinisihlalo wenhanganiso yeZimbabwe Communisty in South Africa, uMnumnzana Ngqabutho Mabhena, uthi kufuze uhulumende weSouth Africa aluthathele amanyathelo loludaba.

“Sizakwenza umkhankaso phakathi kukahulumende weSouth Africa lohulumende waseZimbabwe ukuthi bavumelane ukuthi kube lesitimela ngoba isiporo sikhona esisuka eJohannesburg size siyefika koBulawayo ngoba nxa kungelasitimela lange Easter Holiday kuzabe kugcwele kanje eborder post, abantu bagcina sekusiba lengozi emgwaqweni.”

Kusenjalo, kulezizalwane zeZimbabwe ezimbili ezifele engozini yemota eLephalale eLimpopo kwele South Africa izolo ngesikhathi zilubhekise ekhaya.

Amapholisa athi imota yohlobo lweToyota Pajero ebithwele izizalwane zeBotswana ezinhlanu ingqikilane leyisigengele esincane ebihamba ngezizalwane zeZimbabwe ezimbili zafela lapho kanye lezeBotswana ezintathu.

Amapholisa abelokhu engakavezi amagama abeZimbabwe abafele engozini le.

Facebook Forum

XS
SM
MD
LG