Izizalwane zeZimbabwe ezihlala eSouth Africa ziqhube umhlangano eJohannesburg ngeSonto zisola ukubotshwa lokugwetshwa kwenduna yeNtabazinduna uMnu. Nhlanhlayamangwe Ndiweni.
Izikhulumi ezitshiyeneyo ebezikulo umhlangano zithi ukugwetshwa kwenduna kulandela isinqumo esethulwe yinkundla yakhe, yikudelela isizwe samaNdebele ngenhloso yokusibhidliza.
Umkhokheli wenhlanganiso eqoqe lokhu ukutshengisela eyeButho Lenqama uMnumzana Arbitor Malinga uthi kusobala ukuthi uMnu. Ndiweni ubotshelwe ezombusazwe hatshi isigwebo asethulileyo.
Abanye bathe kusobala ukuthi lesi ngesinye sezenzo zikahulumende kamongameli Emmerson Mnangagwa esokuzama ukujezisa induna uNdiweni ngokuphumela obala ukuthi kasekeli ngitsho lakancane indlela abusa ngayo.
UMnumnzana Chris Ncube odabuka eKezi eMarinoha uthi ukubotshwa kweNduna yesizwe yikubopha inkosi yesizwe okulizilo elingafanelanga ukuthi lekelwe, ngoba kusitsho ukuthi isizwe sesithunjiwe.
Amazwi kaMnu. Ncube agcizelelwe nguMnumnzana Alfios Fuyana yena othi kufanele bavezele uhulumende kamongameli Mnangagwa ukuthi ngeke esadlulela phambili ngokuhlukumeza isizwe sikaMthwakazi.
Kulo umhlangano kuvunyelwene ukuthi kusungulwe isikhwama semali yokuncedisa indleko zokuyaphikisa isigwebo esiphiwe uMnu. Ndiweni emthethwandaba. Inhlanganiso le ithi izasungula njalo uhlelo lokuyatshengisela emahofisini omeli weZimbabwe ePretoria kusukela ngoMvulo.
