Izizalwane ZeZimbabwe ezihlala enkabazwe yaseBhilithane ziye ngobunengi bazo edolobheni leLeicester zizothakazelela ukuvuselelwa kwamasiko esiNdebele kunye lendimi ezikhulunywa eZimbabwe.
Abanatwana abasakhulayo bezizalwane zeZimbabwe abanengi bazalelwa kuleli njalo inengi labo alazi lutho ngeZimbabwe yikho nje AbeMthwakazi Queens UK beqoqe lumcimbi ukuthi bakhuthaze abantu ngokuqakatheka kwamasiko abo njalo babuthanise imali yokuphathisa abaswelayo eZimbabwe. UNkosazana Sazini Malaba ngumqondisi walinhlanganiso.
Kutsho uSazini: “Besilohlelo lwethu lokuhlanganela lemuli zethu njengoba nje umkhathi uyavuma, sokuyisikhathi sokutshisa so sibone kulungile ukuthi sihlanganise izimuli zethu abantwana, obaba, omama sifundisana ngamasiko ethu, besipheke ukudla kwesintu, amangqina, isitshwala, kwasekusiba labantu ade begqokile bemodela impahla zesintu. Besihlanganele nje khonalapha ukubana ukuthi sikwazi ukuthi sikhulise isikhwama sethu seCharity njengoba siliqembu elihamba lincedisa lapha lalapha okudingakala khona usizo.”
Bekulabazali abanengi kulumcimbi njalo bajabule kakhulu ngendlela lumbuthano obuhleleke ngawo.
“Mina nginguZandile Khumalo uMaNyathi ngilapha eLeicester ukuzojabulela ilanga leMthwakazi kugoqela omama labobaba beZimbabwe labantwana kuzowosiwa kushokheswa everything like Zimbabwean. Bekukuhle sibili sikholisile, sithenge ulusu, sidlulusu, sathenga amacimbi, sathenga konke okwekhaya okumnandi,” kutsho uKhumalo.
UNkosikazi Norah Carrington uyagcizelela
“Bekuyiday yefamily kuthengiswa yonke imcimbicimbi yasekhaya, impahla zekhaya, amasi ukudla kwekhaya hayi bekulilanga elimnandi okumangalisayo sihlangana. Sokumele sikwenze bantu beMthwakazi sonke sihlangane lapha nxa siseDiaspora, ngiyabonga,” kutsho uCarrington.
Kwadliwa ukudla kwesintu, kwagidwa imgido yesindebele, kwagqokwa izigqoko zeAfrica, kwakhulunywa indimi zeZimbabwe, bakholisa abadala labatsha kwabuya kwabuthaniswa imali yokuphathisa abaswelayo ekhaya.
Abe Mthwakazi Queens UK bathi imithwa ngokuphindwa ngomnyaka ozayo bazaphinda njalo benze lumcimbi.