amalinks wokungena

Breaking News

Abahlala Phandle Kwelizwe Bamangaliswa Yisimo Esibi Somnotho eZimbabwe


Izizalwane zeZimbabwe ezihlala emazweni atshiyeneyo zithi kuyadanisa ezikubone eZimbabwe ngesikhathi sekhefu leKhisimusi.

Akade bekhangelele ukuthi bazajabula ngesikhathi sekhefu leKhisimusi badane kakhulu kulandela ababhekane lakho bekwele Zimbabwe. Inengi labo lithwele nzima ngokudinga imali emigwaqweni njalo lamafutha ephethulo atholakala nzima.

UMnu. Ryan Ndlovu, osebenza eJohannesburg kwele South Africa, uthi wethuswa ngabhekane lakho eZimbabwe.

“Bekunzima kuKhisimusi le. Uma sintshintsha imali yakhona siyifaka kuma bond, imali yakhona ayihlali, izinto ziyadula. Sifisia ukuthi umumo omnandi wekhisimusi uphenduke ngomnyaka ozayo.”

Uqhubeke esithi ukubonile okusolwa ngabantu bonke eZimbabwe.

“Uma uphandle bekutshele ukuthi kunzima, kwesinye isikhathi awukholwa. Kodwa manje sesivuma,lathi singabuyela emuva siza zama ukwenza okungcono.”

Amafutha ezimota aqhubeka esilela ngamandla kweleZimbabwe, kulendwendwe lendwendwe endaweni okuthelwa khona. Okunye okusilelayo, butshwala, ngemva kokuba amavinkili amanengi ethi aphiwe utshwala obulutshwana yikampani ebuphekayo, eye Delta Beverages.

Lamanamnede lawo ayasilela. Inengi lithembele kuzihlobo eziphandle emazweni afana leSouth Africa kanye leBotswana ukuthi zithumele ukudla.

UNkosazana Ellen Dube, ongumbalisi kwele Botswana, uthi iKhisimusi ekhaya ibingajabulisi.

Uthi kodwa okubaduduzayo yikuthi uma ungantshintsha imali yaphandle efana lamodola eMelika, iRand kumbe iPula, uthola ibond note elithe xaxa.

“Kubi lonyaka. Into ezinengi eziyenza ukuthi ikhefu elifana lekhisimusi likhwabitheke, ziyasilela. Ungakhangela okufana lamanamende, ikakhulu iCoke, akutholakali. Okusiduduzayo yikuthi ungantshintsha imali yaphandle uthola amabond angcono, kodwa imali yakhona ayihlali.”

Noma nje kulukhuni lakunengi elivela phandle kwelizwe, abadala abafana loNkosikazi Sithembile Moyo bona bayathokoza ukuhlangana labantwana babo, abanye ababuya kanye ngomnyaka ekhaya.

“Kuhle khona ukuthi abantwana babuye ekhaya bazobona udubo esitshona sikhuluma ngalo. Noma nje bekungelakhisimusi, ukubona imuli khona kuqakhathekile.

Abanye sebeqalile ukuphindela emazweni abasebenza khon, lomnyaka omutsha ungakafiki, abanye bebalekela ukuminyana okubakhona ngemva komnyaka omutsha, kukanti abanye baxotshwa yizikhwama esezomile.

'Kunzima eZimbabwe Lapho Abantu Abahlupheka Okumangalisayo'
please wait

No media source currently available

0:00 0:02:50 0:00

XS
SM
MD
LG