Izizalwane zeZimbabwe ezimbalwa ezihlala kwele China zithi sezizivalela ezindlini njengabanengi kulelolizwe, kukanti akusayiwa emsebenzini, ezikolo ngitsho lasezitolo kulandela ukuqhamuka komkhuhlane okuthiwa yi coronavirus osubulele abantu abedlula ikhulu, 106, njalo watshiya abazinkululwane ezifika phose ezinhlanu 4515 zigula.
Lumkhuhlane usumemetheke wayangena kwamanye amazwe okubangele ukuthi ilizwe le China livale imingcele yalo njalo litshele uzulu ukuthi engaphuma-phumi ezindlini kumbe ukubonakala emgwaqweni ehamaba-hamba nje ngoba lumkhuhlane umemetheka lula.
Umkhuhlane we coronavirus wandise ukuhlasela inyamazana kodwa usuhlasele abantu, inengi lise China. Uthelelwana ngesikhwehlelo, iziginqo kumbe umphefumulo.
Icoronavirus yaqhamuka edolobheni le Wuhan kwele China lapho okuthengiswa ngokungekho emthethweni inyama edliwa ngabanengi eChina, ebalisa eyezinanakazana ezifana lobomalulwane lamaxoxo lenyamazana ezinjengamaqaqa, amagola lama carmel.
Kwesatshelwa ukuthi lumkhuhlane ulakho ukumemetheka umhlaba wonke ngoba izizalwane zeChina zigcwele emazweni amanengi emhlabeni jikelele, kanye lase Zimbabwe.
Osehlaselwe ngumkhuhlane lo owecoronavirus ubonakala ngokuvuza amakhovula, uqhuqho, ukutshaywa likhanda lokoma umphimbo.
Sixoxa lesizalwane seZimbabwe, uNkosazana Nomalanga Ndebele ohlala edolobheni le Shangai khonale kwele China ukuze sizwe ukuthi umumo unjani kulandela ukuqhamuka kwalumkhulane.
