amalinks wokungena

Izizalwane zeZimbabwe Ezihlala eBotswana Ziyala Ukunanza Uzibuse

  • Martin Ngwenya

Okwenzakale ngoLwesibili koBulawayo eWhite City Stadium.

Bekungelinye nje lamalanga ngoLwesibili kwele Botswana lapho okulezizalwane zeZimbabwe ezithe zingeke zathakazelela uzibuse ekhaya ngoba ilizwe leZimbabwe liyehluleka ukuselela abantu balo.

Ngokunjalo, iwofisi yommeli weZimbabwe eGaborone ayizange izihluphe ngokuqoqa ngitsho umcimbi wokunanza leli lalanga.

Inengi leZimbabwe edolobheni leGaborone livuke libhekane lokubahlupha nsukuzonke, bengakutshayi ndiva ukuthi lilanga lokuthakazelela uzibuse ekhaya.

Abanye bavuke begijimela ukuyadinga imisebenzi, beqhubeka bethwele nzima ngaphandle kwelizwe, bexotshwe ekhaya yibunzima bomnotho oyehluleka ukuba nikeza amathuba emisebenzi.

UMnu. Ndumiso Ncube uthi yena vele kade ekhohliwe lokuthi lamhla lilanga lokunanza uzibuse.

"Bengivele ngilibele lokuthi lamhla lilanga lapho iZimbabwe eyathola khona uzibuse. Kuyini vele okumele sikuthabele? Singaphandle kwelizwe siyadubeka, akula sizatho sibili esingasithabela."

Kukanti uMorgan Muleya yena oqeqetshileyo kodwa ehlala engelamsebenzi eGaborone uthi kuyisimanga ukuthi angabe ethakazelelani ngelanga likazibuse.

"Angithi ma ukhuluma ngozibuse ukhuluma ngokukhululeka ngendlela zonke hatshi ukuncidezelwa ungela ngitsho amathuba omsebenzi."

UNkosikazi Jenifer Ndlovu yena ophila ngokweluka emadolobheni atshiyeneyo, uthi kakwazi lokuthi ibala elithi uzibuse litshoni uma kukhulunywa ngeZimbabwe.

"Utshoni vele uzibuse? Kambe utsho khona ukuhamba sibhoda lamanye amazwe sibalekela indlala ekhaya, thina sisithi siyazibusa?"

Ngobunzima obukhona obubhekane lamahofisi abammeli beZimbabwe kwamanye amazwe obaze bethulwa lasedale lephalamende, kukhanya iwofisi yommeli weZimbabwe eBotswana yehluleke ngitsho lokuqoqa iokulidili okuncane kokunanza lelilanga.

Eminyakeni bekuke kube lemicimbi noma nje ibe ingenwa ngembadalo.

Facebook Forum

XS
SM
MD
LG