Izizalwane zeZimbabwe ezihlala kwele South Africa ezingenelisanga ukuya ekhaya ngekhefu leKhisimusi, zithi sezikulungele ukuthakazelela umnyaka omutsha.
Abanengi bathi bazaqeda ubusuku bonke begida, kudliwa njalo kunathwa. Akubizwa ozwayo endaweni ezinengi ezihlala izizalwane zeZimbabwe kweleSouth Africa njengoba sekuqoqwe amagigi lamagigana okuthakazelela umnyaka omutsha. Abanye bathi kuyoze kuse ngoLweSine betshaya ezabomaskandi. Abanye bona bethi kuyabe kuyiHouse le Hip-pop kuphela. Ngakwelinye icele abanye besithi ubusuku bonke bangoLweSithathu yibusuku beRhumba.
Isizalwane seZimbabwe umnumnzana Kaizer Nxumalo, ohlala elokitshini le Hilbrow uthi amafiriji asegcwele phamu yonke imihlobo yotshwala kanti lezilakalaka zivele sezifakwe ezambeni ukuze babunkunkuluze kahle.
Umnumnzana Sechaba Mokoena, odabuka ePlumtree uthi lizakusa elakusasa belokhu bebheke ngawayizolo egigini abazalenzela elokitshini leYeoville.
Abanyeke abafana lomnumnzana Jotham Nzimande, ohlala elokitshini leBerea bathi noma kuzabe kuyisikhathi sentokozo, bazajabula bezivalele ezindlini ukuze bengalinyazwa yilabo abathi bengathaba bazikhohlwe.
Kusenjalo amapholisa asebike ukuthi azabe engcwele izitalada zonke ubusuku bonke bangolweSithathu ukuze babe leqiniso lokuthi kuba lokuthula emikhosini yokwemukela umnyaka omutsha.
Wonake akhuthaza umuntu wonke ukuthi kusiyatshona ilanga abe eselapho azathokozelela khona umnyaka omutsha ngoba kabufuni ukubona muntu phandle.
Lobanje abanathayo besithi balusizi njengoba amabhawa kuthiwa avalwe, bazaqhubeka ngezingoma lemigido ezindlini kuze kuse.
