amalinks wokungena

Jacob Mudenda: Akudingwe Imali Eyeneleyo Yezempilakahle eZimbabwe


Amalunga edale lephalamende asekhuthaze uhulumende ukuthi kumele angezelele imali kugatsha lwezempilakahle emalini yendleko yesizwe ibudget, esithi kumele ifike kusilinganiso esingaba litshumi lanhlanu ekhulwini - 15 percent.

Lokhu kwethulwe ngumlawuli wedale lephalamende, uMnu. Jacob Mudenda, emhlanganweni owenzelwe eHarare wokuhlaziya ibudget. Kodwa uzulu jikelele lengcitshi zenotho zithi lesi silinganiso siyahlupha ukusifinyelela ngoba uhulumende kalamali njalo kenelisi ukulungisisa indleko zakhe eqakathekisa ukugcina amandla akhe, ikakhulu kwezomvikela.

Ongudokotela wezempilakahle, uMnu. Nkosilathi Shumba, uthi uhulumende kumele asebenze lenhlanganiso ezizimeleyo njengoba engeke enelisa ukuthola limali kubudget.

Ingcitshi yezombusazwe uMnu. Pride Mkono uthe uhulumende kaMongameli Emmerson Mnangagwa usehle watshengisa ukuthi akalani lokunakekela uzulu kodwa ekhangele ukuthabisa abakubutho, abamabhizimisi labalimayo.

Uphinde wathi uhulumende kumele alungisise lokhu ngoba impilakahle kazulu kumele iqakathekiswe ukwedlula konke kunhlelo zonke ezihlaziywa ngabakwezombusazwe.

Omunye njalo ofundisa ngezempilakahle kwesinye isibhedlela eHarare, uMnu. Petros Ncube, uthe uMnu. Mudenda uzama ukuvala uzulu ngokwenza angani uhulumende weZANU PF uthanda abantu.

Omela ikomishini yezempilakahle edale lephalamende, uDokotela Ruth Labode, uthe iphalamende iyajabuliswa yilokho okutshiwo nguMudenda kodwa uthe izibhedlela kumele zehlise inani lezisebenzi ezingelani lokulatshwa kwabantu.

Uhulumende weZimbabwe waloba igama lakhe kusivumelwano esenziwa emhlanganweni wamazwe awezwekazi le Africa jikelele owenzelwa eAbuja, kwele Nigeria ngomnyaka ka 2000 ese Abuja Declaration, esithi isilinganiso se15 percent yemali yeBudget yomnyaka kumele ibekwe eceleni isetshenziswe kugatsha lwezempilakahle.

Lonyaka lolugatsha lwabelwe izigidi ezedlula kancane amakhulu amane zamadola - $408 million -- okuyimali ingcitshi ezithi incane kakhulu ngoba izibhedlela lezinye inhlangothi eziphansi kwalolu gatsha ifuna imali edlula le ukuze lubuyele ekusebenzeni kuhle.

Facebook Forum

XS
SM
MD
LG