UKhuxxman ubengumsakazi olodumo kontuthuziyathunqa okwamanje usedume ngezomculo, osokwenze abe labalandeli abanengi.
Lumculi kuhle kuhle abantu abanengi bamazi ngokuthi nguKhuxxman yena ibizo lakhe eliqondileyo nguKhulekani wakoBethule.
"Ngazalelwa edolobheni lakoBulawayo eMpilo esibhedlela laphana nxa ngicacisa. imfundo yami yonke ngayenza khonapha koBulawayo, kodwa amakatari ukuwaqalisa ngawaqalisela edolobheni elibizwa kuthiwa yiDete".
Abantu abanengi bayawujabulela umculo wakhe uBethule. Uzwakala emcimbini lendaweni ezinengi
"Umculo wami mina ngumculo engiwenzayo ngiyahlangahlanganisa. Ngiyenza iAfro Pop, ngiyenza iDisco Music, ngiyayenza lezesintu, ngingathi ingoma yami yakuqala engayirekhodayo sengizimele ngedwa nguMaAfrica, abantu abanengi bathi MaAfrica bambanani kwasekubuya kulandela idlalade Ngizohamba, kubuye idlalade Lets Unite, kubuye idlalade Uliphindile INyasarandi engayenza loDan Tshanda. Then kukhona ke ingoma la engathi ngithathe umculo wakithi esiNdebeleni ngiwuxubanise leHouse yikho okwaphuma ingoma le ethi VUMELANI ISANGOMA"
Yakhathaza kakhulu lingoma abanengi badlala ngayo amaKhismusi ambalwa adlulayo lanamuhla iyatshisa. UKhuxxman lo kanti vele mthetho wakhe usebenza yedwa kumbe usebenza labanye?
"Sengisebenze labaculi abatshiyetshiyeneyo kugoqela abadumileyo labafana abasaqala, kukhona abafana abanjengabo Unity oMaUzah wabo Achuzzi ngike ngasebenza labo, kubuye uCondry Ziqubu eSouth Africa lamanye amarasta atshiyetshiyeneyo, amaband atshiyeneyo engikengasebenza lawo. Ngikhangelele ukuthi ke kumnyaka ozayo ngiexpande ngokwenza ama collaborations ikakhulu labaculi abakuzinga eliphezulu".
Umculo kaKhuxman ulohlonzi,njengoba umnyaka ozayo ususondele asikhangele ukuthi uzosiphathelani
"Uyabona Tshisa mina ke kumnyaka lo ka2018, umnyaka ozalandela ngikhangelela ukuthi ke ngizaqina kakhulu emsakazweni ngoba ngingumsakazi, ngoba ngelinye ikhono engilalo. Kodwa umculo ngizabe ngilokhe ngiqhubekisela phambili njengoba ngitshilo ke ukuthi ngizayenza ama collaborations labanye abaculi. Yikho engikukhangeleleyo khonokhuyana. Umlayezo engingawutshiyela abantu abalandela umculo wami yikuthi bamelele into ezinengi ezimnandi engizazenza ke kumnyaka ozayo. Kodwa nxa amathuba okusakaza evuleka njengoba imisakazo ikhanya ilokhu ivuleka ngobona engani ngizaphatheka kakhulu kwezokusakaza."
UKhuxxman lijaha elicula likoNtuthuziyathunqa, eMagumeni, Eskies, komfazi utshay'indoda, koNdongaziwelene, njalo umculo wakhe ngoqumbaqumbayo, bajayiva wona abantu kube yiphansi phezulu ngalesisikhathi seKhisimusi kodabuka ibhulugwe.
