Ukwethulwa kwebandla elitsha elikhokhelwa ngowayengumphathintambo wezamafekitali, uMnu. Nkosana Moyo, lembiko kantombazana osakhulayo, uNkosazana Fadzayi Mahere, othi uzancintisa ukuba lilunga ledale lephalamende ezimele, sokudale inkulumo kwezombusazwe.
Abanye bathi ukuncintisa umuntu engela bandla akusizi njalo abanye ngabathi akusela sikhathi sokukhankasa.
Lokhu kwenzakala ngesikhathi amabandla ezombusazwe esebunjwa phose nsuku zonke esithi afuna ukuncintisa kukhetho oluzayo. Abanye bathi lokhu kuzakwenza ibandla le Zanu PF lingqobe kukhetho.
Ukuhlaziya loludaba sixoxe lengcwethi ecubungula ezombusazwe, uMnu. Nkululeko Sibanda, endawonye lentathelizindaba, uMnu. Mxolisi Ncube.
UNcube uthi: "Into ekhona abantu beZimbabwe sebelinde kakhulu baze bakhathala okokuthi akusela muntu othembe omunye ukuthi engamkhokhela kunjalo umuntu lomuntu usebona kungcono ukuthi abe ngumkhokheli."
UNcube uthi kungela kuthembana njalo abantu sebathatha ezombusazwe bazenza indlela yokuphanda imali.
USibanda yena uthi: "Ngibona engani abantu be Zimbabwe abakazilungiseleli ukuthi imisebenzi yabo yezombuso welizwe ibe ngephumelelayo ukuthi khona sekungu June abanye nkhona bengena besithi sebekhankasela ukungena kukhetho olomnyaka ozayo."