Uhulumende ubikwa eselobelane isivumelwano sokuthi izisebenzi zakhe zengezelelwe iholo ngesilinganiso sokungamatshumi alikhulu lasikhombisa ekhulwini, 172 percent, kusiya ngokuthi umuntu uhola malini.
Kodwa umkhokheli wedale elimanyanisa uhulumende lezisebenzi zakhe, ele Apex Council, uNkosikazi Cecilia Alexander uthi isivumelwano abasilobileyo ngesokubambisa nje besakhulumisana ngaloludaba.
Ngesivumelwano lesi, isisebenzi esithola imali ephansi sizahola $2500 ngenyanga. Imali le yedlula nje kancane ikhulu lamadola eMelika.
Izisebenzi zona zithi zifuna imali engafika phose inkulungwane ezinhlanu ngenyanga. Lokhu kwenzakala ugatsha lukahulumende olweZIMSTATS lusithi imali efunwa yimuli elabantu abahlanu ukuthi baphile kuhle ngenyanga ibiyi $4,188 ngamadola eZimbabwe ngenyanga kaLwezi ngomnyaka, lanxa inhlanganiso yeZCTU isithi ifika ku 8000 dollars ngenyanga.
Unobhala jikelele waleyonhlanganiso uMnu. Japhet Moyo uthi uhulumende kumele angezelele iholo lifike kusilinganiso esifunwa yizisebenzi ngoba imali ulayo.
