Umongameli Emmerson Mnangagwa uthi abafihla imali phandle kwelizwe sebeqalisile ukuyibuyisela. UMnangagwa utshele lokhu izizalwane ze Zimbabwe eNamibia ngoMvulo kodwa kethulanga inani lemali le.
Nyakenye uMnangagwa wapha abantu abasusa imali elizweni inyanga ezintathu ukuthi bayibuyisele elizweni bengasoze bathoniswe uMbimbitho engakafiki.
Kodwa uzulu uthi uzakholwa ukuthi imali iyabuyiselwa elizweni nxa kungakhulunywa ukuthi ngobani ababefihle limali njalo yimalini.
Omunye walaba bantu ngumsekeli wesikhulumeli sebandla le National People’s Party, uMnu. Edwin Ndlovu.
"Lokho ngibona ingani yikuxoxa nje kwabantu abaswele into yokwenza. Nxa isibuyile njengelizwe kumele sibekwazi ukuthi kubuye malini njalo evela kobobani," kutsho uNdlovu.
Imbono kaNdlovu igcizelelwe ngomela iBinga edale lephalamende, uMnu. Prince Dubeko Sibanda othi uhulumende usengohlala etshela uzulu okungayisikho njengandlela yokumkhanga ukuthi amsekele.
Kutsho uSibanda: "Okwakuqala engingakutsho yikuthi uhulumende lo okhona, ongene ngo November nguhulumende ongathi uyahlupha ukuthi umlalele ube usuvumelana laye ngaphandle kokuthi kubelobufakazi obubambekayo ukuze uvumelane laye ukuthi akukhulumayo kuliqiniso."
Ingcwethi ecubungula ezomnotho welizwe, uMnu. Masimba Kuchera uthi kungaba liqiniso ukuthi imali isibuyiselwa ekhaya kodwa inani lingaba lingayisilo elikhulunywa nguMnangagwa ukuthi imali le iyafika amabhiliyoni.
"Kungaba liqiniso ukuthi imali isiqalisile ukungena elizweni kodwa sekumele basiphe ama figures ukuthi sekungene malini," kutsho uKutshera.
Umsekeli kamphathintambo wezemali, uMnu. Terence Mukupe utshele iStudio Seven ukuthi mpela imali isingena elizweni kodwa wala ukukhuluma ukuthi yimalini.
