Uhulumende wakwele South Africa lokhe ebuthelela imbono yakhe kumizamo yokusungula ivisa ezakwenza izizalwane zakwamane amazwe, ikakhulu ezeZimbabwe, zihlale kulelolizwe okusemthethweni nxa uhlobo lwama visa olwaphiwa izizalwane zeZimbabwe oluthiwa yi special dispensation lungaphela ngomnyaka ozayo.
Loluhlelo lwaqala ngemva kokuba uhulumende wakwele South Africa esebone kungcono ukuthi inkulungwane zezizalwane zeZimbabwe ziselizweni lelo ngobunengi kodwa zingela maphepha aqondileyo.
Kodwa loluhlelo selufika komlindi uyacina okutsho ukuthi inkulungwane zezizalwane zeZimbabwe zizaithola sezihlala kumbe ukusebenza kulelolizwe okungekho emthethweni nxa ivisa entsha ingakaqali ukusetshenziswa.
Ivisa entsha, ezathiwa yi Southern African Development Community special visa, ikhangelelwe ukuqala ukusetshenziswa ngomnyaka ka 2018.
Omunye wabaphathisa izizalwane zeZimbababwe ekukhulumisanane lohulumende wakwele South Africa ngodaba lolu, uMnu. Nqabutho Nicholas Mabhena owenhlanganiso ye Zimbabaweans In South Africa, utshele iStudio 7 ukuthi bazama ukuncedisa abantu abanengi ukuthi belungise amaphepha abo.
"Okwenzakala kathesi njengoba satsho ukuthi uhulumeni wakwele South Africa ufuna ukutshintsha umthetho ngolwasemzini okuthiwa yi international migration," kutsho uMabhena.