Inani lezehlakalo zodlakela lwezombusazwe seliqansile phambilini kokhetho. Kunsukwana ezisanda kwedlula kutshiswe imota ye MDC-T, izitolo zikamsekeli kamongameli webandla, uMnu. Elias Mudzuri lezindlu zabasekeli bebandla.
Ngokhetho luka 2008 ibandla le MDC-T lathi kwabulawa abasekeli balo abangamakhulu nganxa yodlakela lwezombusazwe.
Abanye besabela ukuthi udlakela luzakuba lunengi ukwedlula iminyaka yonke.
Ukuhlaziya loludaba sixoxe locubungula ezombusazwe, uMnu. Max Mkandla endawonye lomsekeli wesikhulumeli sebandla leMDC-T, Unkosazana Thabitha Khumalo onguye osungula lingxoxo.
"Angithi siyazi sonke ukuthi nxa iZanu ingaqalisa ukwehluleka umuthi wabo omkhulu yibudlwangudlwangu bokutshaya abantu bebatshisela izindlu baqalise ukutshaya abantu ukwenzela ukuthi bathi yebo yekelani sibavotele," kutsho uKhumalo.
Umkandla yena uthi udlakela ngolwangamabomu njalo lwenziwa ngabantu abangazi lutho.
"Kodwa yenba lowu olokhu ehlala etshaywa uzacina laye esebisela ecine ewina," kutsho uMkandla.
