Sokuyimvama ukuzwa ngokutshengisela eZimbabwe lezinsuku uzulu ekhonona ngezikhalazo ezimbalwa osokuze kuchithekela lakuzizalwane zelizwe ezikwamanye amazwe afana laseMelika, oBhilithani, Canada lamanye, abantu bekhonona ngokuthile okungaphathwa kuhle nguhulumende osembusweni okwamanje.
Izolo abantu babhaxabulwe ngamapholisa eHarare betshengisela bekhonona ukuthi kabafuni ukuza kwemali yephepha yamaBond Notes.
Kulokutshengisela okwenziwa ndawana yonke ngabasakhulayo bekhala ngokuthi abayiboni imisebenzi abayithenjiswayo kukhetho luka2013.
Abanye ngabathi umongameli Robert Mugabe akasuke esikhundleni ngoba esehlulekile, emikhankasweni ejengaboTajamuka/Sesijikile, owe#ThisFlag owasungulwa ngumfundisi Evan Mawarire leminye eminenginengi.
Umbuzo okhona ngothi kambe ukutshengisela lokhu kuba lezithelo na? nanku abeWoza labo kade betshengisela lamhlanje koBulawayo ngodaba lwemfundo.
Ukuhlaziya loludaba uPraxedes Jeremiah oweStudio 7 uxoxe labalwela ilungelo loluntu abathi uNkosazana Magodonga Mahlangu owe nhlanganiso yeWoza, eloNkosazana Silethemba Mathe wakoBulawayo. Umqalisiziba kunguNkosazana Mathe.
