Ibandla leMDC-T libe lomhlangano wenkokheli, owe National Executive kunye lele National Council owenzwe ngenhloso yokulungisisa ukufuthelana okusebandleni leli okwalethwa yikukhethwa kwabasekeli bakamongameli abanye ababili lokuqondisa isisekelo sombuso webandla ukuze samukele abasekeli laba.
Abasekeli baka Tsvangirai sebebalisa uNkosazana Thokozani Khuphe, uMnu. Nelson Chamisa loMnu. Elias Mudzuri.
Ukufuthelana kulethwe yikuba uTsvangirai ubikwa wahlala phansi eyedwa wasekhetha abasekeli bakhe esephula isisekelo sombuso esithi kumele kube lomhlangano wamadale womabili ukuze kube lenguquko engekho esisekelweni sombuso webandla.
Kulabasekeli ababili bebandla abasa loludaba emthethwandaba besithi uTsvangirai kumele engavunyelwa ukukhetha abasekeli laba.
Umhlangano lo uke wamiswa kulandela ukuphoselwa kwentuthu ehitshayo emahofisini alelibandla, iHarvest House ngamapholisa kulandela ukutshengisela kade kukhona eHarare okwenziwe ngabantu kade besithi uhulumende egnalokothi asungule imali yohlobo lwama bon notes akhangelelwe ukusebenza ngenyanga ka Mfumfu.
Umsekeli wesikhulumeli sebandla leMDC-T, uNkosazana Thabitha Khumalo uze wasiwa esibhedlela ngemva kokuba intuthu le imhitshile.
Unobhala jikelele webandla leli, uMnu. Douglas Mwonzora utshele iStudio Seven ukuthi kuvunyelwene kwalungisiswa isisekelo sombuso webandla.
Kodwa enye inkokheli ebisemhlanganweni lo engafunanga ukuqanjwa ngegama ithi lanxa kulotshwe ezinye inhlamvu zesisekelo sombuso webandla bekungela kuvumelana.
Ukuhlaziya loludaba sixoxe lengcwethi ecubungula ezombusazwe, uMnu. Zenzele Ndebele ukuze sizwe imbono yakhe ngaloludaba.
Kutsho uNdebele: "Udubo lwe MDC yikuthi khonoko abathi bafuna ukukulwisa kuMugabe yikho asebesiba yiko khona."
