amalinks wokungena

Breaking News

Kasisoze Silahle Imbeleko Ngokufelwa:Raza


Zimbabwe Cricket team.

Umdlali weqembu labesilisa elimela ilizwe emdlalweni kakhilikithi uSikandar Raza uthi ikusasa yaleliqembu inhle loba nje linqotshwe ngele Bangladesh kumidlalo egoqela eye test, ODI kanye le T20.

URaza uthi iqembu le Zimbabwe litshengise ingqubelaphambili kuyo yonke imidlalo eliyidlale leqembu le Bangladesh lba nje belingela abanye abadlali balo abathenjiweyo abalesikhathi eside bedlalela iqembu lesizwe.

“Kuyo yonke imidlalo sitshengise intuthuko ethile kuzigaba ezitsheyeneyo zomdlalo. Akukho lula ukudlala imidlalo efana lale singela abadlali abalolwazi olujulileyo.

Sonke siyakwazi ukuba baqakatheke kangakanani abadlali ababalisa uSean Williams, uCraig Ervine kanye lo Brendan Taylor kodwa indlela abadlali abasakhulayo abadlale ngayo isipha ithemba elokuba ikusasa yethu inhle kakhulu uma singenelisa ukulungisisa amaphutha amancane okuyiwo adala umehluko kumpumela yomdlalo,” kutsho uRaza.

Iqembu le Zimbabwe lele Bangladesh adlale umdlalo owodwa owohlobo lwe Test wona ophele ele Bangladesh linqobe ngama runs angamakhulu amabili lamatshumi amabili (220).

Ngemva kwalokho amaqembu lawa adibane kumidlalo emithathu eyohlobo lwe One Day International njalo ele Bangladesh linqobe kuyo yonke kwasekusiba khona njalo imidlalo emithathu eyohlobo lwe Twenty20 yona efike emaphethelweni ele Bangladesh linqobe kwemibili kwathi ele Zimbabwe lanqoba kowodwa.

URaza uthi okumupha isibindi yikuba kulemidlalo embalwa lapho abancintise baze banqotshwa umdlalo ususemaphethelweni.

“Kumidlalo emibili eye ODI silwise kwaze kwaba yisigaba sokucina esomdlalo. Yinto eseikhulume ngayo singabadlali ukuba kungaphi lapho okumele silungisise khona njalo kuzamele sibe ngabantu abazizwa belephango lokuba benqobe kuthi lalapho izinto zingani azisihambeli kuhle singethuki,” kutsho uRaza.

Umdlali osakhulayo uWesley Madhevere ngomunye wabadlali abatshengise ukuba ikusasa yeqembu ingabanhle njengoba ekhethwe ukuba nguye umdlali odlale kuhle emdlalweni wesibili owe Twenty20.

Kolunye udaba olumayelana lezemidlalo, abanye babadlali bakwele Zimbabwe abaselizweni leJapan ukuyaphatheka kumidlalo ye 2020 Summer Olympics abathi uDonata Katai kanye lo Peter Purcell – Gilpin kabayenelisanga ukuncintisa baze bathole imendulo.

UKatai uphelele kuma heats awomncintiswano wokuntsheza owe 100 metre backstroke kwathi uPurcell – Gilpin yena ufinyelele ku quarter – final eyomncintiswano wokugwedla owe single sculls wasephelelwa ngumphako.

NgoLwesibili umdlali wokubhukutsha uPeter Wetzlar uzancintisa kumncintiswano we 100 metre freestyle.

NgoLwesine mhla zingamatshumi amabili lathoba munwe munye uScott Vincent uzaphatheka kumncintiswano we golf ikanti umdlali wokugijima uNgoni Makusha yena uzancintisa ngoMgqibelo mhla zingamatshumi amathathu lanye.

Facebook Forum

XS
SM
MD
LG