Abantu abaqhubeke besiyabhalisa ukuvota kakutsha kusetshenziswa imitshina ye Biometric Voter Registration okuqale ngoMvulo koBulawayo babhekane lenkinga ezimbalwa ezibalisa ukungaphumi kuhle kwamabizo endawo zokuvotela lokwehluleka kwemitshina ukuthatha imapawu zeminwe, amafinger prints.
Abanye abadibane laludubo liqula lenkokheli zeMDC Alliance ezibalisa nguMnu. Welshman Ncube.
USenator David Coltart labanye labo bathwale nzima ukuba impawu zeminwe yabo ziphume kahle. Ezinye indubo ebezikhona zibalisa ukuphuza ukuqala, ukungabi lengwalo eziqondileyo ezifakaza amakheli kunye lokungaphumi kahle kwezithombe.
UBulawayo utholiswe imitshina yama BVR kits azasetshenziswa kuluhlu olutsha lwabavoti kukhetho lomnyaka ozayo, elikhulu eli letshumi.
Ababhalisayo ukuvota bangabhalisa endaweni lapho abakhona nxa belamaphepha aqondileyo. Amabizo ababhalisileyo azaphuma endaweni eyodwa yokuvotela eseduze lalapho abahlala khona abazavotela khona njalo.
Uhlelo luzakwenziwa ngamahlandla amane koBulawayo. Amahlandla lawo azakhangela indawo eziphithizelayo eziqintini zako Bulawayo.
Uhlelo lolu lokubhalisa lukhangelele ukufinyelela abantu abafika inkulungwane ezingamakhulu amane lamatshumi amane lane (444 000) koBulawayo kuphela, endaweni zokubhalisa ezilikhulu lasikhombisa (107).
Ekhuluma ngemva kokubhalisa ukuvota, umsekeli kamongameli weMDC Alliance, uNcube, ukhuthaze abantu ukuba bayebhalisa ukuvota laloba kusaselengxaki ezithize ethi bakhangelele ukuthumela ikhomidi yabo yekhetho ukuba iyekhulumisana leZEC ngengxaki ezikhona.
Kuthi uMnu. Kucaca Phulu, umsekeli kamongameli webandla le PDP, uthe bebezokwenza isibonele ekhuthaza abanye bakhe ukuthi babeke ukuxabana eceleni bakhuthaze abantu ukuba bayebhalisa ukuvota.
Ilunga ledale lephalamende uNkosikazi Thabitha Khumalo, ongumsekeli wesikhulumeli sebandla le MDC-T, uthe ukubhalisa sekuqalisile ngakho abantu kabaze ngobunengi bazobhalisa ukuze bakhuphe umbuso wokungcindezela.
UNkosikazi Christabel Sibutha laye ukhuthaze abesifazana abanengi ukuba baze bazobhalisa ukuvota ukuze bavote labo bangene ezikhundleni zombuso.
UNkosikazi Sikhululekile Moyo wengezelele esithi omama kumele basukume ngobunengi ukuze baphile kuhle kusasa njalo badinge usekelo lwabo kukhetho oluzayo.
Evumelana loMoyo, uNkosizana Linda Sibanda, uthe omama beZimbabwe basebenza kakhulu ngakho kumele bangene ukuze bayeqeda ubugwelegwele obukuhulumende.
Kusukela izolo iZEC ibiphakathi kokufundisa abantu abedlula amakhulu amathathu kwamalanga amabili abazabhalisa abantu ukuvota koBulawayo.
Ngemva kokubhalisa ukuvota abantu bazabizwa njalo ukuba bezohlola ukuba amabizo abo akhona kuluhlu lokubhalisa ukuvota kodwa amalanga akhona awakabunjwa.
Ekubhaliseni ukuvota kudingakala isithupha sephepha, esezenge leseplastic, ipassport esebenzayo kunye lencwadi efakaza ikheli yalapho umuntu ahlala khona.