amalinks wokungena

Breaking News

Bekithemba Ndlovu: IBulawayo City Kayisoze Iphume kuPSL Lonyaka


Iqembu lenguqu leBulawayo City

Umqeqetshi weqembu leBulawayo City uBekithemba Ndlovu uthi ulethemba lokuthi leliqembu lizasinda ekugunyulweni kusigaba sePremier Soccer League (PSL) ekupheleni kwemidlalo yalonyaka.

UNdlovu utshele intatheli ngemva kokunqotshwa kweqembu lakhe yiFC Platinum nge1 ka 0 ngempelaviki ukuthi indlela abafana bakhe abadlale ngayo imupha ithemba lokusinda.

“Ngibatshayela ihlombe abafana bami ngendlela abadlale ngayo leqembu eliphethe isicoco seLeague lanxa nje sicine sitshayiwe nge 1 ka nya,” kutsho uNdlovu.

“Ngokubona kwami kusemandleni ethu ukuba sisinde ekugunyulweni ekupheleni kwesizini ngoba yikho esesikudlalela njalo ngilethemba ukuba sizakwenza lokho kumidlalo elitshumi lantathu eseleyo.”

Iqembu leBulawayo City liyale lilokhu lisendaweni yesithathu nxa usuka ngaphansi kwengalane yemiklomelo ngemva kwemidlalo yamaviki angamatshumi amabili lanye ikanti ele FC Platinum lona likhuphule inani lemiklomelo elilayo laya kumatshumi amane lathobamunwemunye njalo yilo elihlezi phezu kwengalane.

Endaweni yesibili kuleNgezi Platinum yona enqobe iNichrut nge3 ka 2 njalo elilemiklomelo engamatshumi amane lesikhombisa.

Kuzinga lesithathu kuleqembu leChicken Inn lona elitshaye ele Shabanie Mine nge3 ka 0 njalo lilemiklomelo engamatshumi amane.

Iqembu leCAPS United lona lisendaweni yesine njalo lilemiklomelo engamatshumi amathathu lanhlanu. Linqobe eleBlack Rhinos nge1 ka nya.

Amanye amaqembu asengozini yokugunyulwa kuPSL agoqela eleMutare City lona elijeke amanye wonke ngemiklomelo elitshumi lambili kuphela.

Iqembu leShabanie Mine lisendaweni yesibili nxa usuka phansi kuthi eleNichrut lisendaweni yesine nxa usuka emsileni njalo.

Umdlalo obumele ube phakathi kweqembu leHighlanders leleDynamos udluliselwe phambili njalo iPSL ayikatsho ukuthi uzadlalwa nini.

Facebook Forum

XS
SM
MD
LG