Owayengumongameli wakwele Zambia, uKenneth Kaunda, kasekho. UGibbs Dube usethulela loludaba.
Iphephandaba leHerald libika ukuba uKaunda ebhubhe namuhla esibhedlela seMaina Soko Medical Centre eLusaka. Akwaziwa ukuba ubulewe yini uKaunda, ongene esibhedlela lesi kunsukwana ezedluleyo ecela ukuba abantu bamthandazele.
Bayakhala abantu emhlabeni wonke jikelele ngokubhubha kuka Kaunda. UMnu. Vusumuzi Sifile Sibanda, umqondisi wePanos Institute of Southern Africa obesebenza loKaunda kulez’insuku, uthi kwephula inhliziyo ukubhubha kwakhe.
USibanda, osebenzela eLusaka, uthi uKaunda ubeyindoda emadodeni.
UMnu. Isaac Mabuka, owalwa impi yenkululeko ekubandla leZapu, uthi kwephula inhliziyo ukubhubha kuka Kaunda.
UMnu. Nick Mangwana, unobhala wohlangothi lukahulumende olubona ngezemibiko, uthi uKaunda wasebenza kakhulu ekubenjweni kwenhlanganiso ezinjenge Southern African Development Community lezinye. Lokhu kusekelwa nguMnu. Belive Gaule, okubandla leZanu PF.
UKaunda wabusa eleZambia kusukela ngomnyaka ka1964 kusiyafika umnyaka ka1991.