amalinks wokungena

Breaking News

Amaqembu Atshiyeneyo Ekhilikithi Aselungiselela Imidlalo Emikhulu Ezakwenzelwa eBhilithini


Amaqembu omdlalo kakhilikithi amela amazwe atshiyeneyo akwele Zimbabwe ukuzophatheka kumncintiswano wokudinga amaqembu azakuyadlala kumidlalo yezizwe zomhlaba ezaqhutshelwa elizweni lase Bhilithani ngomnyaka ozayo.

Umncintiswano wokudinga amaqembu azakuyaphatheka kumidlalo yezizwe zomhlaba uyaqala okusemthethweni ngeSonto mhla zine kunyanga kaMbimbitho kodwa imidlalo yokuzwana amandla iqale namhla enkundleni ezitshiyeneyo emadolobheni abalisa elako Bulawayo, ele Kwekwe kanye lasesigodlweni iHarare.

Amaqembu alitshumi adinga ilungelo elokuyaphatheka kumncintiswano wezizwe zomhlaba ozaqhutshelwa kwele Ngilandi lase Wales ngomnyaka ozayo afakwe kuzibaya ezimbili njalo ngemva kwemidlalo yezibaya amaqembu amathathu azabe ehlezi phezu kwengalane yemiklomelo azadlulela kusigaba esilandelayo esibizwa kuthiwa yi Super Six.

Ngemva kwemidlalo ye Super Six amaqembu amabili azabe ephezu kwengalane yemiklomelo yiwo azathola ilungelo elokuyadlala kumidlalo yezizwe zomhlaba ngomnyaka ozayo.

Ilunga lequla eliqoqa limidlalo, iLocal Organising Committee, uVumindaba Moyo uthi konke sekulungele ukuba umncintiswano uqale ngeSonto.

“Imidlalo isiyoqalisa manje konke ebesikhuluma ngakho sekwenzakele yikho ke zulu wako Bulawayo wozani ngobunengi lizobukela imidlalo kakhilikithi enkundleni ezibalisa eye Queens Sports Club kanye lase BAC njalo akubhadalwa kungenwa mahala enkundleni.”

Amazwe aphatheke kulimidlalo ngagoqela ele Ireland, ele Netherlands, ele Papua New Guinea, ele United Arab Emirates kanye lele West Indies akusibaya sika Group A.

Kusibaya sika Group B kule Afghanistan, iHong Kong, iNepal, iScotland kanye lele Zimbabwe.

Imidlalo yesibaya sika Group A izaqhutshelwa esigodlweni iHarare lapho okuzasentshenziswa inkundla ye Harare Sports Club kanye leye Old Hararians ikanti eyesibaya sika Group B izaqhutshelwa edolobheni lako Bulawayo enkundleni ye Queens Sports Cluba kanye leye Bulawayo Athletic Club.

Amaqembu amabili azaphumelela kulimidlalo eqhutshelwa kwele Zimbabwe azakuyangqikilana labalisa ele South Africa, ele Australia, ele New Zealand, ele India, ele Sri Lanka, ele Pakistan, ele Bangladesh kanye lele Ngilandi ngomnyaka ozayo kumncintiswano wezizwe zomhlaba khonale kwele Ngilandi.

Udaba Esilethulelwe NguJoseph Njanji
please wait

No media source currently available

0:00 0:01:59 0:00

Facebook Forum

XS
SM
MD
LG