amalinks wokungena

Breaking News

Kho! Esiqongweni seCastle Lager Premier Soccer League Iqembu leManica Diamonds


Manica Diamonds FC

Iqembu leManica Diamonds likhuphuke layahlala phezu kwengalane yemiklomelo ngemva kokunqoba ele Highlanders nge 1 ka nya, kuviki yesithathu eyemidlalo yeCastle Lager Premier Soccer .

Iqembu leManica Diamonds lihlezi phezu kwengalane lilemiklomelo eyithoba munwe munye ngemva kokunqoba kuyo yonke imidlalo emithathu eseliyidlale kulisizini.

Umqeqetshi walo uJohannes Nhumwa utshele intathelizindaba zemidlalo ekupheleni komdlalo ukuba uyajabula kakhulu ngendlela iqembu lakhe eliqhuba ngayo.

“Ngemva kokuba sike sama kanengi nengi impumela leyi inhle kakhulu ngoba senelise ukunqoba sidlala singekhaya.

Yingqubela phambili njalo kutshengisa ukuba sidonsa ngamandla. Kunjalo vele emdlalweni wenguqu.

Osekumele sikwenze yikuba sidlale ngokuzimisela kuyo yonke imidlalo esibhekane layo,” kutsho uNhumwa.

Impumela yomdlalo weqembu le Manica Diamonds lele Highlanders itshiye abalandeli beqembu le Bosso sebekhonona kakhulu emakhasini atshiyeneyo ebulenjini njengoba lilomkhomelo owodwa kumidlalo emithathu njalo lingazake lihlohle selokhu kuqale imidlalo yeligi.

Endaweni yesibili engalaneni yemiklomelo kuleqembu le Ngezi Platinum lona elilemiklomelo eyisikhombisa njalo elingadlalanga kulimpelaviki ngoba owalo umdlalo ungazange udluliselwe phambili kumpelansonto ezimbili ezedluleyo lapho elitshaye khona ele Herentals nge 3 ka nya.

Iqembu le FC Platinum lihlezi endaweni yesithathu lilemiklomelo eyisithupha njalo alidlalanga kulimpelaviki eyedluleyo ngoba umdlalo walo leqembu le Bulawayo Chiefs udluliselwe phambili ngenxa yomkhuhlane we Covid 19.

Endaweni yesine kuleqembu le Dynamos lalo elilemiklomelo eyisithupha njalo elinqobe ele Cranborne Bullets nge 1 ka nya ngeSonto.

Umqeqetshi weqembu le Dynamos uthi besekubaphuzele ukuba bedlale ukuze belungisise amaphutha abawenze emdlalweni weviki lesibili lapho abanqotshwe khona liqembu le Triangle.

“Uyazi kuqembu le Dynamos nxa sithe sadliwa siyabe sifuna ukuba siphange sidlale ukuze sikhohlwe ngempumela eyedluleyo. Okwenzakeleyo yikuba sihlale amaviki amabili silokhu sihlekwa ngabantu ngoba sanqotshwa liqembu le Triangle.

Kuyangithokozisa ukuba abadlali bami bayenelisile ukuba batshengise ukuba ngamadoda sibili banqoba loba umdlalo ubungekho lula,” kutsho uNdiraya.

Emsileni wengalane kuleqembu le Bulawayo City lona elithole umklomelo walo owakuqala ngoMgqibelo ngemva kokuba ngutshiki lobhanqa 3 ka 3 lele Whawha.

Amanye amaqembu alomklomelo owodwa ngabalisa ele Tenax lona elihlezi endaweni yesibili nxa usuka emsileni kodwa eselidlale kabili kuphela njengoba umdlalo walo lele Chicken Inn udluliselwe phambili, ele Highlanders elisendaweni yesithathu nxa usuka emsileni, ele Cranborne Bullets elisendaweni yesine nxa usuka emsileni kanye lele Yadah elihlezi endaweni yetshumi lane

Facebook Forum

XS
SM
MD
LG