amalinks wokungena

Breaking News

Kubekwa Amatshe Okwabekwa Khona Ababulawa yiGukurandi


Gukurahundi

Inhlanganiso ebona ngamalungelo oluntu eye Ibhethsu LikaZulu isebenzelana lamabandla ezombusazwe athi eleMRP leleZAPU isiqale uhlelo lokubeka amatshe kuzozonke indawo okwabulawelwa abantu abanengi bagqitshelwa godi linye bengangcwatshwanga ngenhlonipho ngombhuqazwe weGukurahundi eNkabazwe leMaNdebeleni jikelele.

Ilitshe lakuqala lifakwe eBhalagwe esiqintini seMatobo ezansi yeMaNdebeleni.

Ngemva kwempi yenkululeko, eleZimbabwe isigaba seMandebeleni leNkabazwe sahlaselwa ngumbhuqazwe weGukurahundi kusukela ngomnyaka ka1983 kusiya ngo1987 lapho kwathunyelwa ibutho leviyo leFifth Brigade lazobulala abantu mahlayana libacala ngokusekela ibandla leZAPU, elalikhokhelwa ngumuyi uMnu Joshua Mqabuko Nkomo.

Unobhala jikelele weIbhetshu LikaZulu, uMnumzana Mbuso Fuzwayo uchaza isizatho esibenze baqala lumsebenzi.

“Lamhlanje silapha eBhalagwe ukuzofaka ilitshe elikhombisa ukuba kulabantu ababulawa mahlayana kule indawo njalo babulawe ngemva kokuba ilizwe selithethe uzibuse,” kutsho uFuzwayo.

Ngesikhathi kufakwa ilitshe eBhalagwe, amapholisa abikwa ebesefuna ukubalela laloba bebephiwe imvumo yokuqhuba lumsebenzi njalo uNduna Ndiweni enguye owakhetha lindawo.

Kutsho ufuzwayo: “lingisa ngaphi lina lingafuni ukukhuluma lami angingeke naqhubeka ngihamba lani lina linanikhulumisi uma kunjalo lami sengiphenduka.”

Umkhokheli weMRP, uMnunzana Mqondisi Moyo ubuke inyathela elithethwe Libhetshu LikaZulu ethi kuyindlela yokulondoloza imbali ngezolo embi ebhekane loMthwakazi.

“Siyabona ukuba eBhalagwe sibuka lomsebenzi weBhalagwe, ukubekwa kwelitshe leli kuzakuba yimbali emqoka kuzizukulwane zethu laloba amapholisa ebefuna ukuvimba,” kutsho uMoyo.

Umgcinisihlalo weZAPU ezansi yeMaNdebeleni, uMnunzana Mathew Sibanda uthi ukubulawa mahlayana kwamalunga eZAPU leZPRA lokhe kubazwisa ubuhlungu lanamhla lokhu.

Kutsho uSibanda: “Ilanga lalamhlanje lisizwisa ubuhlungu ngabanye bethi ababulawa bengela cala ngemva kokulwela ilizwe ukufaka ilitshe kuzalondoloza imbali yeGukurahundi ukuthi ingalibaleki.”

Abantu abadlula inkulunwane ezingamatshumi amabili babikwa babulawa ngesikhathi sombuqazwe weGukurahundi, eziqintini ezinengi zezigabeni zonke zeMandebeleni leNkabazwe.

Abe Ibhetshu LikaZulu sebebike ukuba yonke indawo okulamathuna agqitshelwa abantu bebanengi bengangcwatshwanga ngenhlonipho bazahamba befaka amatshe bethi abantu balakho ukubazisa ngezindawo abazaziyo ukuba zagqitshelwa abantu ababulawa mahlayana ukuze bafake ilitshe.

please wait

No media source currently available

0:00 0:02:39 0:00

Facebook Forum

XS
SM
MD
LG