Kubhubhe abantu abangamatshumi amabili lane, 24, ngeCovid-19 eZimbabwe izolo njalo kwatholakala abedlula kancane ikhulu, 115, belomkhuhlane lo.
Lokhu kukhweze inani lasebebanjwe lumkhuhlane kulelilizwe laya kunkulungwane ezedlula amatshumi amathathu, 33,388.
Asebebhubhile bona bakhwele baya kunkulungwane eyodwa elamakhulu amabili lamatshumi phose amabili 1,217.
Lanxa belokhe bebanengi ababanjwa umkhuhlane lo kanye labafayo, amanani la ehlile kakhulu nxa kuqathaniswa lakumaviki ambalwa edluleyo.
Uhulumende yena uthi usemelele ukuthenga amajekiseni okuvikela iCoronavirus ayizigidi ezingamatshumi amabili, 20 million.
Uthi uleUS$100 million ekhangelane lalumsebenzi.
Umphathintambo wezemali uMnu Mthuli Ncube uthi amajekiseni la azakwanela izizalwane zeZimbabwe eziyizigidi ezilitshumi, 10 million.
Uthi inani lelo yilo elimele lihlatshwe ukuze umkhuhlane lo uphele elizweni, okuthiwa yi-herd immunity.
UMongameli Emmerson Mnangagwa uveze kumaviki edluleyo ukuthi abezempilakahle yibo abazaqala ukuhlatshwa lijekiseni.
Kodwa umbuzo omkhulu ngothi uhlelo lolu luzaqhutshwa kuhle na kungela nkohlakalo phakathi.
Isiphathamandla seBulawayo Progressive Residents Asociation uMnu Thembelani Dube utshele iStudio 7 ukuthi uhlelo lolu kumele luqhutshwe kuhle njalo abakuhulumende yibo abamele bahlatshwe kuqala ukuze baphe uzulu isibindi.
