Kubhubhe abantu abangamatshumi ayisithupha lambili, 62, ngeCovid-19 eZimbabwe ngoLwesithathu.
Ugatsha lwezempilakahle lithi kufunyanwe njalo abazinkulungwane phose ezintathu, 2,705, belomkhuhlane lo.
Lokhu kukhweze inani lasebebulewe yilumkhuhlane laya kunkulungwane phose ezintathu, 2,809, kuthi asebetholakele belawo bakhwele baya ngale kwenkulungwane ezingamatshumi ayisitshiyagalolunye, 91,120.
Abahlatshwe ijekiseni yakuqala yokuvikela lumkhuhlane ngoLwesithathu bedlula inkulungwane ezingamatshumi amane lanhlanu, 45,148.
Abahlatshwe eyesibili bona bazinkulungwane phose eziyisikhombisa kuphela, 6,987.
Abantu asebehlatshwe ijekiseni yakuqala bonke sebengu-1,292,642, kuthi asebehlatshwe eyesibili njalo ingeyokucina sebengu-656,830.
Umkhuhlane lo usumemetheka ngamandla elizweni lonke njalo isibhedlela seParirenyatwa leseSally Mugabe eHarare zibikwa besezigcwele ngabantu abaleCovid-19 ngoLwesithathu ntambama zingasamukeli izigulane.
Kusenjalo, udubo lokusilela kwezimota ezithwala uzulu luya phambili ngenxa yokuvinjwa kwamakhombi angabhalisanga ukuthi asebenze ephansi kwenkampani kahulumende eyeZupco.
Lokhu sokubangele ukuthi abantu besale egcekeni besehluleka ukufinyelela indawo ezehlukeneyo.
Isiphathamandla senhlanganiso yeTransbakwena & Motorways uMnu Lehlohonolo Mokwena utshele iStudio 7 ukuthi ngabe uhulumende uyavumela zonke izimota ukuze kuqedwe loluhlupho.
