Kulabantu abathathu ababulawe yiCovid-19 eZimbabwe izolo kanye labedlula ikhulu, 121, ababanjwe lumkhuhlane.
Phakathi kwababhubhileyo kuloyedwa weMasvingo, omunye wakoBulawayo lomunye njalo weHarare.
Lokhu kukhuphule inani lasebedliwe yilumkhuhlane kuleli laya kumakhulu phose amathathu, 294.
Asebebanjwe lumkhuhlane elizweni lokhe sebezinkulungwane ezedlula itshumi, 10839.
Asebepholile bakhuphuke ngabangu-92 baya kunkulungwane phose eziyisitshiyagalolunye, 8972.
Abalokhe begula bakhwele baya kunkulungwane elamakhulu edlula amahlanu, 1573.
I-Bulawayo yiyo elokhe ihamba phambili ngabagulayo bengu-579 ilandelwa yiMatabeleland South ngabantu abangu-259.
I-Harare ikuzinga lesithathu ngabantu abangu-210 ilandelwa yiMashonaland West yona elabantu abangu-156.
Phakathi kwabangu-121 ababanjwe umkhuhlane lo izolo, abangu-32 ngabakoBulawayo kuthi abangu-74 ngabeMatabeleland North.
Kuloyedwa weMasvingo, abalitshumi beMidlands, labane abeManicaland.
Isiphathamandla senhlanganiso yeBulawayo Progressive Residents Association uMnu Thembelani Dube utshele iStudio 7 ukuthi bakhathazekile kakhulu ngendlela umkhuhlane lo omemetheka ngayo.
