Kubhubhe oyedwa ngeCovid-19 eZimbabwe ngeSonto njalo kwatholakala abalitshumi lambili belomkhuhlane lo.
Lokhu kukhweze inani labantu asebebulewe yilumkhuhlane kusekela nyakenye laya kunkulungwane elamakhulu edlula amahlanu, 1,525, kuthi asebetholakele belawo sebezinkulungwane ezingamatshumi phose amane, 36,923.
Ugatsha lwezempilakahle luthi abahlatshwe ijekiseni yakuqala yokwenqabela lumkhuhlane izolo bazinkulungwane phose eziyisithupha, 5,709, njalo abahlatshwe eyesibili bangamakhulu phose amathathu, 276.
Inani lasebehlatshwe ijekiseni yakuqala kuphela selokhe loluhlelo lusungulwe ngenyanga edluleyo selifike kunkulungwane ezilikhulu lamatshumi phose amabili, 117,297.
Asebehlatshwe eyesibili njalo ingeyokucina sebezinkulungwane ezingamatshuli edlula kancane amabili, 21,603. Asebehlatshiwe bonke sebengu138,900.
Uhulumende uthi ukhangelele ukuhlaba abantu abayizigidi ezilitshumi, 10 million.
Kusenjalo, amanye amakholwa esiKhristu athi enelise ukuqhuba imilindelo ngekhefu lePhasika, lona eliphela namuhla, elandela iziqondiso sokuvimba ukumemethekwa komkhuhlane weCoronavirus.
Umfundisi Thandeko Zinti Mnkandla utshele iStudio 7 ukuthi bayathokoza ngalokhu ngoba nyakenye bengenelisanga ukulinanza njengenjwayelo lelikhefu.
