Iziphathamandla zebandla leZANU PF ezithi ummeli weHighfield uMnu. Psychology Maziwisa lowayeyintathelizindaba kumsakazo weZBC uMnu. Oscar Pambuka babotshiwe ngoLwesibili, bakhangelelwe ukumiswa emthethwandaba kamantshi ngoLwesithathu besetheswa icala lokwamukela imali kunkampani yeZESA ngokungekho emthethweni.
Abablili laba babotshwe yikhomishini elwisana lenkohlakalo eye Zimbabwe Anti-Corruption Commission, yona ethi bemukela inkulungwane ezingamatshumi amabili lambili, lamakhulu amahlanu amadola, $12, 500 ngemva kokuqhuba umsebenzi kunkampani yeZESA ngaphandle kwemvumo ye tender.
Isiphathamandla salikhomishini uMnu. Goodson Nguni utshele iphephandaba leThe Herald ngoLwesithathu ukuthi oMnu. Maziwisa loPambuka, abakhokhela inkampani yeFruitful Communications, babesebenzelana lowayengumphathintambo obona ngezamandla kagetsi uMnu. Samuel Undenge, laye osanda ukubotshwa wakhululwa ngemali yesibambiso se bail.
UMnu. Jonathan Samukange, igqwetha elimela oMnu. Maziwisa lo Pambuka ugcizelele ukuthi ngempela ababili laba bazamiswa emthethwandaba ngoLwesithathu.
Kusukela ibutho lithatha umbuso kowayengumongameli uMnu. Robert Mugabe, liqhuba elithi yi Operation Restore Legacy, sekubotshwe iziphathamandla ezimbalwa zebandla leZANU PF, kodwa abanye bathi ngezisekela uhlangothi lweG40 yalelibandla, hatshi abasekela umongameli Mnangagwa, abecele elithiwa Team Larcoste.
Abe Larcoste, inengi labo abaxotshwa kubandla le Zanu PF ngesikhathi uNkosikazi Grace Mugabe eqhuba imbuthano yama rally athiwa ngama Youth Interface.
Akula ngitsho loyedwa owexuku le Team Larcoste oseke wabotshwa lanxa bekhona abacatshangelwa nguzulu ukuthi banotha okwesabekayo ngenxa yobugulugutu.
Kodwa uDokotela Priscilla Mntungwa Ndlovu, isizalwane seZimbabwe esihlala kweleMelika uthi mhlawumbe inyathelo leli lingaphathisa ukuqeda inkohlakalo elizweni.
“Ngingazake ngithi mina yikuqophana ngohlangothi ngoba asikakwazi ukuthi kuyini okwenzakalayo. Mina nginbona ungani ilizwe lakithi lahlala isikhathi eside kakhulu kungelamthetho icorruption isize yaza yayafika lasemapholiseni,” kutsho uNdlovu.
