Amapholisa asebophe uMnu. Charlton Hwende, omele iKuwadzana East edale lephalamende ekubandla leMDC elikhokhelwa nguMnu. Nelson Chamisa.
UHwende ubotshwe efika eZimbabwe evela kwele Namibia. Wetheswa icala lokuzama ukususa esikhundleni uhulumende kaMongameli Emmerson Mnangagwa okungekho emthethweni.
Ukubotshwa kwakhe kwenziwe ngesikhathi inkantolo ithethe isinqumo sokuthi uNkosazana Joanna Mamombe, laye okubandla leMDC owetheswa icala elifanayo, kumele avalelwe enkantolo. Icala lakhe lizathoniswa ngeviki ezayo.
Ababili laba ngabanye abakubandla leMDC okuthiwa batshotshozela uzulu ukuba atshengisele emigwaqweni ngoZibandlela ekhonona ngokugugudeka komnotho welizwe.
Kulabantu abedlula itshumi lambili ababulawa ngesikhathi uzulu etshengisela emigwaqweni kuthi njalo inkulungwane ezimbalwa zavalelwe entilongweni zisetheswa ukweba impahla emavinkilini lokwenza ubudlwangudlwangu ngoZibandlela.
UNkosikazi Dorcas Sibanda, olilunga ledale leSenate omele iBulawayo Metropolitan, uthi kulusizi ukubotshwa kwenkokheli yebandla le MDC.
“Udaba lolu nxa lusemthethwandaba, abantu kuthiwa babotshiwe kutsho ukuthi inkokheli zizahlala phansi zibone okokwenza kodwa okwakhathesi okula lutho esingalukhuluma.”
Ekhuluma leStudio 7, igqwetha lika Mamombe uMnu. Obey Mushava uthe bazakuya eHigh Court kodwa bephenduke njalo kumthethwandaba mhlaka 19 Mbimbitho bezovikela uMamombe.
“Besiphikisa phambi kukaMantshi ukuthi ukubotshwa lokuthunjwa kuka Joanna Mamombe bekungekho emthethweni njalo besisala ukuhlaliswa kwakhe ejele. Besisithi ngesikhathi ebotshwa akazange aziswe ukuthi ubotshelwani, okwesibili yikuthi amahola angamatshumi amane lasitshiyangalombili wokuthi abesemiswe phambili komthethwandaba adlula esezandleni zamapholisa kanye lokuthi kwakungela bufakazi bokuthi wephula umthetho kodwa-ke umthethwandaba uthe kulobufakazi bokuthi uMamombe wenza umhlangano lentathelizindaba. Lokhu yikho okwenze bathi engabe elecala ngakho-ke sizabuyela emthethwandaba mhlaka 19 Mbimbitho 2019.”
Kusenjalo, inkokheli yezifundi ekunhlanganiso yeZimbabwe National Students Union isichothoze ukubotshwa mahlayana kwamalunga ebandla leMDC njalo lokugugudeka komnotho weZimbabwe.
Bathi amalunga abo athwele nzima emakolitshini abalise eyeLupane University, Great Zimbabwe University, Great Zimbabwe lamanye lapho abehluleka ukuhlawula imali yemfundo.