Amapholisa abophe uMnu Patson Dzamara lomfundisi uPatrick Mugadza ngoMvulo, bephakathi kokutshengisela eAfrica Unity Square phezu kokunyamalala kukaItai Dzamara.
UMugadza loPatson, ongumnewabo kaItai, bebebuthene labanye bethandazela uDzamara njalo benanza umnyaka owodwa lenyanga ezimbili enyamalele.
Ababili laba bakhululwe bengetheswanga cala.
UMnu Dzamara uthunjwe libalele eHarare nyakenye ngabantu abangaziwayo njalo akwazakali ukuthi usaphila na.
Abemuli yakhe bathi wathunjwa ngamacuphi bakahulumende bezama ukumthulisa phezu kohlelo lwakhe lokutshengisela esola umbuso weZanu PF.
Kodwa uhulumende uyakulandula lokhu njalo uthi wenza konke okusemandleni akhe ukumdinga.
Omunye obetshengisela eAfrica Unity Square ngoMvulo, uMnu Charles Nyoni usole kakhulu ukubotshwa kukaPatson loMugadza.
“Sizaqhubeka sitshengisela singelakwesaba uhulumende aze amkhulule uItai kumbe asitshele ukuthi ungaphi,” kutsho uMnu Nyoni.
