Unobhala jikelele webandla leMDC-T, uMnu. Douglas Mwonzora ubotshiwe ngemva kokukhonona ngokuhlukuluzwa kukamongameli webandla lakhe, uMnu. Morgan Tsvangirai emthethwandaba we High Court ngoLwesibili.
UTsvangirai ubesemththwandaba kucala aletheswa ngumkhokheli webutho, uColonel Christopher Mayoyo othi wangcolisa igama lakhe lapho aze athi wayekhokhekhela udlakela phambilini kokhetho luka 2008.
Ngalokho uMayoyo uthi ufuna ukuhlawulwa imali engamadola azinkulungwane ezingamakhulu amahlanu, $500 000. UTsvangirai uthe engena emththwandaba amapholisa athi kumele aveze isithupha sakhe uMowonzora athe yikumhlukuluza ngoba kungelamuntu ongamaziyo uTsvangirai.
Kodwa amapholisa ahle amdumela ayamvalela esitokisini se Harare Central lapho kade elokhu ekhona ebusuku bangoLwesibili.
IStudio 7 ixoxe lomsekeli wesikhulumeli salelibandla, uNkosazana Thabitha Khumalo othi njengoba ukhetho selufika eduze ibandla le Zanu PF seliqalile ukuhlukuluza amalunga ebandla lakhe.
"Kuyasidanisa ukubona amapholisa esebenzisa isandla esinzima entweni ezicacileyo kangaka. Kambe shuwa umuntu engabotshelwa ukwazisa amapholisa ukuthi umuntu obizwe ecourt wake waba ngu Prime Minister we Zimbabwe njalo ulelungelo lokuthi ahlonitshwe lanxa esengayisuye uPrime Minister," kutsho uKhumalo.
