Omunye wabaphathintambo ababona ngohlelo lokuxolelana elizweni uMnu Moses Mzila Ndlovu ubotshiwe ngamapholisa eLupane ngoLwesihlanu.
UMzila, oyisiphathamandla njalo secele leMDC elikhokhelwa nguMnu Welshman Ncube ubikwa ebotshwe ekuseni esuka eLupane esiya eVictoria Falls lapho ekade ekhangelelwe ukwenza umhlangano ophathelane lohlelo lokuxolelana.
UMnu Mzila ubikwa ebotshelwe amazwi awethule emhlanganweni wohlelo lokuxolelana obuse lupane ngoLwesithathu.
Kulumhlangano inengi belikhalaza ngokuthi labo abadala amacala okubulala ngesikhathi seGukurahundi kumele bajeziswe.
Ngemva komhlangano wangoLwesithathu lo, amapholisa ahle abopha umfundisi wenkonzo yeRoma uFather Marko Mabutho Mkandla emethesa icala lokuphatheka emhlanganweni obungaphandle komthetho. UMkandla lokhe evalelwe esitokisini.
Amagqwetha kaMzila aweAbammeli Human Rights Lawyers koBulawayo abikwa ebephakathi kokukhulumisana lamapholisa eLupane kusihlwa izolo ukuba amkhulule.
Kodwa abebandla lakhe bathi ulakho ukulala esitokisini ngolweSihlanu. Isikhulumeli seMDC kaMnu Welshman Ncube koBulawayo uMnu Edwini Ndlovu usole kakhulu ukubotshwa kukaMzila.
