Amapholisa athi abophe abantu abedlula amakhulu amahlanu, 581, ngoMgqibelo abangene eZimbabwe ngokufohla imingcele bevela emazweni afana leSouth Africa.
Isikhulumeli samapholisa uMnu Paul Nyathi wazise izolo ukuthi abangu-557 babantu laba babotshelwe eBeitbridge kwathi abanye babotshelwa emngceleni egoqela oweNyamapanda loweChirundi.
Kucatshangelwa ukuthi abantu laba ngabasebenza phandle asebelanda ikhefu lekhisimusi.
UMongameli Emmerson Mnangagwa usanda kwethula umlayo ophoqa bonke abavela phandle kwelizwe ukuthi bahlolwe lumkhuhlane nxa befika emingceleni njalo baphinde bagcinwe kuma-quarantine centers kungakhathalenile ukuthi balawo na lumkhuhlane kumbe kabalawo.
Amapholisa athi kulabantu abalitshumi lanye ababanjwe iCovid-19 ababaleke ku-quarantine center eBeitbridge ngoLwesine.
Isiphathamandla senhlanganiso yeCitizens Covid-19 Monitor uMnu Effie Dlela Ncube uthi ukufohla abantu bengahlolwanga lumkhuhlane kufaka uzulu jikelele engozini enkulu.
Amazwi kaNcube agcizelelwe ngumqondisi wenhlanganiso yeRural Communities Empowerment Trust uMnu Vumani Ndlovu.