Isikhonzi sikahulumende weZimabwe kweleBelarus njalo engusomabhizimusi odume ngokuthengisa izikhali uMnu Alyaksandr Zingman ubotshiwe kweleDRC ngesikhathi ezama ukugada indizamtshina esiya eHarare.
UZingman ubotshwe ngeviki edluleyo ngemva kokuhlangana lowayenguMongameli weDRC uMnu Joseph Kabila.
Akukacaci kuhle ukuthi ubotshelweni. Kodwa amanye amaphephandaba athi engaba ebezama ukuthengisa izikhali ngaphandle komthetho.
UZingman ubikwa elobudlelwano loMongameli Emmerson Mnangagwa njalo ababili laba sebeke baphuma emifanekisweni bebonke.
Umphathintambo obona ngokwethulwa kwemibiko uNkosikazi Monica Mutsvangwa labogatsha lwezomvikela abaphendulanga imibuzo esibathumele yona ngaloludaba.
Ukuhlaziya loludaba sixoxe lengcwethi kwezombusazwe uMnu Brilliant Mhlanga yena othi lanxa kungakacaci ukuhle ukuthi uZingman ubotshelweni, okusobala yikuthi ungumuntu oseduzane kakhulu loMnangagwa.
