amalinks wokungena

Breaking News

I-Zimbabwe Idinga Ukubopha Isizalwane seMelika Esibulle Isilwane u"Cecil"


Uhulumende udinga isizalwane seMelika, umnumzana Walter James Palmer wase Minnesota phezu kodaba lokubulawa kwesilwane ebesidume okwamagama kuzethekeli, esanikwa igama lokuthi “Cecil”. Lesi silwane ebesesileminyaka elitshumi lantathu yokuzalwa, sibulewe epulazini le Antoinette Farm eGwayi Conservancy eHwange.

Umnumzana Palmer ubikwa ehlawule amatshumi amahlanu lanhlanu enkulungwane zamadola akweleMelika-$55,000, komunye wabazingeli umnumzana Theo Bronchorst we Bushman Safaris, owetheswa umlandu laye wokuphatheka kulesi sehlakalo. Emthethweni bekumele ahlawule inkulungwane ezilikhulu zamadola ukusizingela.

Emazwini awethulwe emhlanganweni lentathelizindaba, owenzelwe eMedia Centre lamuhla emini, abenhlanganiso ebona ngezamankampani agcina inyamazana zendle ye Safari Operators Association of Zimbabwe ndawonye lababona ngezokulondolozwa kwazo eye Parks and Wildlife Management Authority of Zimbabwe, baveze ukuba lesi silwane besilodumo kuzethekeli endaweni yeMain Camp lapho kugcinwa khona inyamazana zendle e Hwange National Park.

Umqondisi we SOAZ umnumzana Emmanuel Fundira uthi ingcwethi kwezokuzingela, umnumzana Theo Bronkhorst olenombolo yelicense ezithi 553, owaphatheka laye ekubulaweni kwalesi silwane kanye lomnini ndawo lapho sibulawelwe khona, umnumzana Honest Trymore Ndlovu betheswa umlandu wokusizingela okungekho emthethweni.

Ababili laba, uFundira uthi bekhangelelwe ukumiswa phambi komthethwandaba kusasa njalo belakho ukugwetshelwa ukuhlala entolongweni okweminyaka elitshumi loba ukuhlawuliswa amatshumi amabili enkulungwane zamadola akweleMelika ( US$20,000 – 00 ). Uthi amapholisa afisa ukubuzisisa omunye walezingcwethi kwezokuzingela, umnumzana Zane Bronkhorst olenombolo ye lisensi yakhe kungu 558, obikwa kunguye owasibulalayo.

UBronkhorst, wetheswa umlandu wokubulala uCecil, epulazini le Antoinette elisendaweni egcinwa inyamazana zendle eye Gwai Conservancy, eHwange ekuqaleni kwenyanga kaNtulikazi.

Umnumzana Thulani Ncube , ovela emangweni weDete uthi udaniswa yilesi senzo sokubulawa kwalesi silwane u“Cecil”.

UNcube uthi ufisa ngabe iphathisa kwezentuthuko inzuzo etholakala kumali evelela kunhlelo eziphathelene lenyamazana zendle ebuya labkwamanye amazwe.

UPalmer ubikwa esebenzelane lomnini we pulazi le Antoinette ukusibulala lesi silwane. UNdlovu ubikwa enze lokhu okungekho emthethweni njengoba engelayo imvumo yokuzingela izilwane kuwonalo umnyaka.

Ababotshelwe leli cala uNdlovu kanye lo Theo Bronchorst babikwa bezamiswa phambi komthethwandaba ngoLwesithathu.

Bengatholakala belecala bazakugwetshelwa ukuhlala ejele okweminyaka elitshumi loba ukuhlawuliswa inkulunwane zingamatshumi amabili zamadola akweleMelika-$20,000.

XS
SM
MD
LG