Ikhomithi eyakhethwa ukucubungula udaba lwamalunga edale lephalamende abikwa aphatheka kunkohlakalo kunkampani ye Hwange Colliery, yenqabele omela iZengeza West kulelidale uMnu. Job Sikhala, yena oligqwetha, ukuthi amele abanye bakhe kuloludaba.
Amalunga la ayekukhomithi yeMines and Energy, abalisa uMnu. Temba Mliswa owayengumgcinisihlalo wayo, uMnu. Leonard Chikomba webandla leZANU PF omela iGokwe Kabuyini, uMnu. Anele Ndebele weMagwegwe loMnu. Prince Dubeko Sibanda we Binga North, bobabili bengabebandla leMDC.
uMnu. Sikhala ubefuna ukumela uMnu. Ndebele loMnu. Sibanda, kodwa watshelwa ukuthi angeke akwenze lokhu ngoba laye elilunga ledale lephalamende. Uthi uzakhweza udaba lolu emthethwaba ophezulu owe high court ngoba ulelungelo lokumela ingqe ngubani. Udaba lolu luzaqhubeka luthethwa ngoLwesibili lapho usomabhizimusi uMnu. James Goddard akhangelelwe ukufakaza.
Idale leli liphinde lacubungula udaba lokuthi kungani amankampani encingo zabomakhalekhukhwini ekhuphula imithelo. Ibhanga elikhulu eleReserve lithi akufanelanga imbadalo ibengamadola eMelika ngoba balutshwana abawafinyelelayo. Ukuhlaziya loludaba, sixoxe loMnu. Thandeka Zinti-Mnkandla, owake waba lilunga ledale lephalamende.
