Uzulu weleMelika usosizini olukhulu kulandela ukufa kwabantu abangamatshumi phose ayisithupha abadutshulwe ngowesilisa omhlophe edolobheni leLas Vegas eNevada ngeSonto ebusuku.
Abantu laba bebesegigini lomhlabeleli wengoma zeCountry, uJason Aldean.
NgoMvulo emini amapholisa athe ebesefumene izidumbu ezingamatshumi amahlanu lasitshiyagalombili (58) njalo athe kulabantu abalimeleyo abedlula amakhulu amahlanu.
Athe njalo inani labafi lilakho ukuqansa.
Asenelisanga ukuthola imbiko yokuthi zikhona na izizalwane zeZimbabwe ezingaba zifele kulesi sehlakalo kumbe zilimele.
UMongameli weleMelika uMnu. Donald Trump kanye lamalunga edale lephalamende bethule amazwi endunduzo basola kakhulu isehlakalo lesi.
Isizalwane seZimbabe esihlala eMelika, uMnu. Den Moyo, ongumgcinisihlalo njalo weMDC-T laye ukusolile kakhulu lokhu.
Amapholisa igama likamsolwa nguSteven Paddock njalo athi utholakale efile ehoteleni yezitezi adubule abantu laba ekiyo.
Lokhu ngokwakuqala eMelika ukuthi kufe abantu abanengi kangaka kusehlakalo sokudutshulwa kwabantu, imass shooting ngesingisi.
Ukudutshulwa kwabantu mahlayana kuyinsakavukela umchilo wezidwaba eMelika ngoba kulula kakhulu ukuthenga umbobho.