Bekungabizwa ozwayo NgoMvulo esibhedlela seMpilo Central Hospital ko Bulawayo ngesikhathu umqondisi weDumi International Foundation uMnu, Dumisani Moyo enikeza uWard 6 kuziphathamandla zesibhedlela logatsha lwezempilakahle.
UMoyo ucele abesibhedlela ukuba baphathe kahle imitshina lakho konke okuhle okulungiswe kuWard 6 ethi isibhedlela singahlawulisi uzulu imali enengi ngale indawo njalo ukhangelele ukwenza okufanayo eUnited Bulawayo Hospital kanye leThorngroove Infectious Diseases Hospital.
"Kuhle ukuthi lamukele isipho lesi ngicela lisigcine kuhle njalo lingahlawulisi uzulu imali enengi ozangena kule iWard njalo ngikhangelele ukwenza okufanayo eUBH leThorngroove.
Obemele umabhalane wogatsha lwezempilakahle uDokotela Gibson Mhlana ubonge isipho esihle sokulungiswa kakutsha kwesibhedlela ethi kuyinto enhle.
"Siyabonga ngesipho esihle esisiphiwe nguMnunzana Moyo noba ukhuphe konke okudala wafaka okutsha njalo kaqali ukwenza okuhle kuyabukeka lokhu okulapha.
Umcinisihlalo webhodi yeMpilo Central Hospital uNkosikazi Celesile Moyo Ncube laye ubonge isipho lesi.
"Siyabonga isipho esisiphiwe nguDumi, sifisa ukuthi ngabe sithola abanye abasemazweni abenza njengaye wenze iward yabakuzinga lomhlaba kwezempilakahle.
UMgcinisihlalo wenhlanganiso yezakhamizi eye Bulawayo Residents Association uMnu. Winos Dube laye ugcizelele amazwi kaNkosikazi Ncube
"Siyabonga ukuba uDumi usiphe isipho esingaka esingabonekiyo njengelizwe kuyajabulisa njalo kugcwalisa izifiso zethu zokubona isibhedlela sivuselelwa.
IMpilo Central Hospital yakhiwa ngomnyaka ka1957 imitshina eminengi kulesi sibhedlela ayisasebenzi impahla enengi isiyingozi kuzigulane lezisebenzi.
Inhlanganiso yeDumi International Foundation isebenzise inkulungwane ezingamatshumi edlula athoba minwe mibii zmadollar-$85 000 ekulungiseni uWard 6.
EMpilo Central Hospital kusukela lamuhla isilezindlu ezimbili zezigulane ezikuzinga lezibhedlela zomhlaba. Umphathintambo wakoBulawayo, uNkosikazi Angeline Masuku kunye loMqondisi weMpilo Central Hospital babonge kakhulu uMoyo bethi kuhle akwenzileyo yikho ukusebenza umuntu ekhumbula ekhaya lokhu akwenzileyo.
IDumi International Foundation ikhuphe konke obe sokukudala kuWard 6 yafaka impahla entsha lemitshina.
