Imidlalo ye Castle Lager Premier Soccer League ifike komlindi uyacina ngoMgqibelo kulemidlalo eyithoba minwe mbili edlalwe enkundleni ezitshiyeneyo zelizwe.
Iqembu elihlezi endaweni yesibili engalaneni yemiklomelo ele Ngezi Platinum Stars libe ngutshiki lobhanqa 0 ka 0 leqembu le Black Rhinos okuyimpumela etsho ukuba liphutshe litshiywe ngemiklomelo elitshumi lambili liqembu eliphakamise isicoco salonyaka ele FC Platinum.
Iqembu le Ngezi lilemiklomelo engamatshumi ayisithupha lesithupha kuthi ele FC Platinum lona eliphutshe imidlalo yalo phakathi kweviki lilemiklomelo engamatshumi ayisikhombisa lathoba minwe mbili.
Endaweni yesithathu kuleqembu le Chicken Inn lona elibe ngutshiki lobhanqa 1 ka 1 lele Triangle eLuveve njalo lilemiklomelo engamatshumi amahlanu lesikhombisa kuthi ele Triangle liphutshe lisendaweni yesine lilemiklomelo engamatshumi amahlanu lesithupha.
Umqeqetshi weqembu le Triangle uTawurayi Mangwiro utshele intathelizindaba zemidlalo ekupheleni komdlalo ukuba iqembu lakhe lidlale kuhle lonyaka njengoba liphinde laphakamisa lenkezo ye Chibuku Super Cup.
Kweminye imidlalo edlalwe namhla iqembu le Yadah libe ngutshiki lobhanqa 1 ka 1 lele Harare City, amaqembu e CAPS United le Chapungu abe ngutshiki lobhanqa 0 ka 0 kwaba lempumela afanayo njalo phakathi kweqembu le ZPC Kariba kanye lele Bulawayo Chiefs lazo ezitshayane zaze zabhekana kungela qembu elenelise ukulitshayela emambuleni.
Iqembu le Shabanie Mine libhaxabulwe nge 4 ka nya ngele Herentals kuthi ele Mutare City Rovers linqotshwe nge 2 ka nya ngele Bulawayo City ikanti ele Nichrut livalelise isigaba se PSL ngokwenza izimanga lapho litshaya ele Dynamos nge 3 ka nya.
Iqembu le Nichrut ngelinye lamaqembu agunyulwe kusigaba saphezulu ngemva kokuphutsha imidlalo yalonyaka esendaweni ezine ezisemsileni wengalane njalo amanye akhona ngabalisa ele Shabanie Mine, iMutare City Rovers kanye lele Bulawayo City.
