amalinks wokungena

Breaking News

Kukhunjulwa Amaqhawe Alwa Ekuvuyo leZIPRA Laqalisa Ukulwisana Labamhlophe


Abalwa bekuvuyo leZIPRA bamanyana lenhlanganiso yeIbhetshu Likazulu ngosuku lokunanza amaqhawe eZimbabwe.

Ilanga lokukhumbula abalwa impi yenkululeko abancitshwa inhlonipho yobuqhawe lesizwe eZimbabwe jikelele obuqoqwe yinhlanganiso yeIbhetshu LikaZulu imanyene labalwa impi yenkululeko abeZIPRA, luqhutshwe kahle emathuneni kazulu eLady Stanley Cemetery lase Stanley Hall koBulawayo.

IZimbabwe iphakathi kwekhefu lokukhumbula amaqhawe alwela ilizwe alele endaweni ezehlukeneyo emhlabeni jikelele.

Phakathi kwawo wonke amaqhawe asakhothamayo alwela ilizwe, akhona abhubha ilizwe lingakakhululeki lalapho selikhululwe kodwa uhulumende wabangcitsha inhlonipho yobuqhawe kabalalanga emathuneni amaqhawe aziwayo kodwa bangcwatshwa endaweni ezehlukeneyo.

Umongameli webandla leZapu, uMnu. Dumiso Dabengwa, labanye bakhe emathuneni eLady Stanley koBulawayo ngoMvulo.
Umongameli webandla leZapu, uMnu. Dumiso Dabengwa, labanye bakhe emathuneni eLady Stanley koBulawayo ngoMvulo.

Isikhumbuzo lesi siqhutshwe ngaphansi kwendikimba ethi, ‘Commemorating the Sacrifices of the Unsung Heroes: Truth: Our Tool, Our Pride.’

Umabhalane weIbhetshu Likazulu, uMnu. Mbuso Fuzwayo, uthe umcimbi wabo uphumelele njalo baqale ngokuyahlonipha amaqhawe alele emathuneni ePhelandaba bafaka amaluba basebesiya eLady Stanley Cemetery koBulawayo lakho abafake amaluba ethuneni lomkhokheli webutho uLookout Masuku, uCharles Gray labanye.

UMqondisi weZPRA Veterans Association, uMnu. Ben Ncube, uthe kubelilanga elihle lokunanza ibutho elasebenza gadalala kodwa lancitshwa inhlonipho.

Ilunga leZAPU elalwa impi likuviyo lebutho leZPRA, uNkosikazi Toriso Phiri, uthe uyajabula ukuba ngoMvulo babelethuba elihle lokuhlonipha ibutho elakhulula ilizwe.

UMongameli weZAPU, uMnu. Dumiso Dabengwa, uthe kuqakathekile ukukhumbula amaqhawe agoqela umuyi uLookout Masuku angahlonitshwanga nguhulumende.

Uthe kumnyaka ozayo umkhosi uyakhula isigaba lesigaba sizananza amabutho eZIPRA njalo amagama abo bazaqala ukuwalomba.

Uthe akhona amanye amaqhawe esifazane awalalwa impi abalisa uJane Tshabalala, uJudith Todd labanye ethi babaphanga inhlonipho okumele bayithole.

Ibhetshu likaZulu lebutho leZPRA basungule uhlelo lokukhumbula lawo maqhawe inengi lawo alele eLady Stanley Cemetery KoBulawayo, agoqela uLookout Masuku, Swazini Ndlovu, Richard Dube, Masala Sibanda, Charles Grey, Rueben Dingani, Luke Mhlanga, Amos Patrick Ngwenya, Welshman Mabhena, Isaac Nyathi, Grey Bango, Abel Siwela, Solomon Tshuma, Philimon Mabuza labanye.

Abanye balwa impi yenkululeko bekuvuyo leZIPRA
Abanye balwa impi yenkululeko bekuvuyo leZIPRA

Emathuneni ePelandaba kulele oMnu. Lazarus Nkala, Shelton Ngcebetsha, Mhlongelwa Ndlovu, Samuel Ndebele, Jini Ntutha, kuthi uBrigadier General Sigoge wathi atshiswe umlotha wakhe uyelahlelwa kumfula uZambezi labanye abehlukeneyo abalele endaweni ezehlukeneyo ababalisa uThenjiwe Lesabe.

Inkokheli ezivela kumabandla ezombusazwe ezibalisa iMthwakazi Republic Party, Alliance for National Salvation, Movement for Democratic Change, People;s Democratic Party, National People’s Party, abenhlanganiso ezizimeleyo lababotshwa ngesikhathi sempi basekele uhlelo lokukhumbula amaqhawe bapha inkulumo zokubahlonipha.

Inkokheli zomdabu ezigoqela uKhayisa Ndiweni, osewakhothamayo loNduna uMangwende, ngabanye abaphiwe inhlonipho ngokuphatheka ekukhululweni kwelizwe.

Amaqhawe akhothama empini yeLalaphansi, Insukamini leGadade lawo aphiwe inhlonipho yobuqhawe.

Facebook Forum

XS
SM
MD
LG