Amapholisa eBeitbridge athi kulabantu abathathu abagalule bafela kumfula uLimpopo ngesikhathi bezama ukuchapha bengena kweleSouth Africa ngaphandle komthetho.
Inkundla yeZimLive ithi amapholisa akhiphe isidumbu esisodwa emanzini njalo imizamo yokukhipha ezinye ezimbili isaqhubeka.
Linkundla ithi amakhosikazi ababili balababantu yiwo ahambe ayabikela amapholisa ngalesisehlakalo ngoMvulo.
Bebanengi abafaka impilo zabo engozini ngokweqa uLimpopo egqcwele besiya kweleSouth Africa ukuyadinga imisebenzi ngoba bengelancwadi zokuhambisa.
Ama-passport ayadula kanti njalo katholakali kalula eZimbabwe. Inkulungwane lenkulungwane ezabhalisela ukuwathola sezilesikhathi eside zimelele.
Abanengi bayabotshwa mihla ngemihla kulezinsuku ngamapholisa lamasotsha aseSouth Africa bebuyiselwe ekhaya.
Umqondisi wenhlanganiso yeZimbabwe Christian Alliance uMfundisi Useni Sibanda utshele iStudio 7 ukuthi yinto edanisayo kakhulu ukuthi abantu bafela kuLimpopo bebalekela umumo omubi elizweni.
Isikhulumeli samapholisa uMnu Paul Nyathi yena utshele lumsakazo ukuthi ubengenelisi ukukhuluma ngoba ubephathekile.