Inhlanganiso ye United Nations World Tourism Organization ngoLwesibili ilobelane isivumelwano lele Zimbabwe kanye le Zambia. Isivumelwano lesi siqondisa amazwe la womabili ukuthi aqalise amalungiselelo womhlangano omkhulu wale inhlanganiso ozakwenziwa eVictoria Falls le Livingstone ngomnyaka ozayo.
Umnu. Nkosilathi Jiyane umayor we Victoria Falls uthe uMongameli Robert Mugabe lomunye wakhe weZambia uMongameli Michael Sata batshengise ukuthokoza beloba isivumelwano lesi.
UJiyane uthe isivumelwano lesi sethulwe nguMnu. Taleb Rifal unobhala jikelele wenhlanganiso le. URifal uthi ufuna ukuthi umhlangano we World Tourism Organization General Assembly ozakwenziwa ngoMpandula ngomnyaka ozayo uphumelele.
Uphinde wathi okujabulise ele Zimbabwe kakhulu yikuthi sokuzavuleka amathuba amanengi okutshengisa izethekeli ukunotha kwaleli lizwe ngezemvelo ezithandwa ngabavela emazweni womhlba.
Uqhubeke etshela iStudio 7 ukuthi okwenzakale ngoLwesibili kukhuthaza abantu bemazweni ukuthi bazebona indawo zemvelo kwele Zimbabwe bengesabi lutho.
Umnu. Daniel Ndlela ingcwethi kwezenotho ezimele yodwa uthe ukulothswa kwalesi sivumelwano kutshengisa ukuthi iWorld Tourism Organization iyasuthiseka ngokwenzakala eZimbabwe.
