Kulomuntu oyedwa obulawe yiCovid-19 eZimbabwe izolo labangamatshumi amathathu ababanjwe lumkhuhlane. Obhubhileyo lo ngoweMidlands.
Lokhu kukhweze inani lasebebulewe yilumkhuhlane selokhu waqhamukayo kuleli laya ku254.
Kulabalitshumi lasikhombisa njalo abafunyanwe sebepholile.
Idolobho lakoBulawayo yilo elikhokhelayo ngenani lababanjwe lumkhuhlane izolo abalitshumi lane, lilandelwa yiManicaland elabahlanu.
I-Masvingo leMatabeleland South zilabantu abane ngendawo kuzokuthi iMidlands, iMashonaland East leMashonaland Central lazo zilomuntu oyedwa ngendawo ngendawo.
Inani labo bonke asebebanjwe umkhuhlane weCoronavirus eZimbabwe selifike kunkulungwane eziyisitshiyangalombili ezilamakhulu edlula amahlanu, 8561.
Asebesilile besesedlula inkulungwane eziyisitshiyangalombili, 8023, kuthi abalokhu begula bona bangamakhulu phose amathathu, 284.
I-Bulawayo yiyo ehamba phambili ngabagulayo abangu102 ilandelwa yiHarare elabangu67.
Asebebanjwe lumkhuhlane emhlabeni jikelele bedlula izigidi ezingamatshumi amahlanu, 50,7 million njalo asebefile bedlula isigidi, 1,261,306, ngokutsho kweJohns Hopkins University.
Kukhanya sokulethemba lokuthi umuthi wokwelapha lumkhuhlane usulakho ukutholakala ngemva kokuba inkampani yakweleMelika, iPfizer yazise izolo ukuthi ukuvivinya ekwenze umuthi ephakathi kokuwulungisa kuveze ukuthi umuthi lo usebenza kuhle ngesilinganiso sokungamatshumi ayisitshiyagalolunye ekhulwini, 90 percent.
Inkampani le isizadinga imvumo yokuthengisa lumuthi kugatsha lukahulumende weMelika olweFood and Drug Administration.
Isizalwane seZimbabwe esihlala eBhilithani uMnu Difa Dube utshele iStudio 7 ukuthi kungaba kuhle mpela ungatholakala umuthi ukuze kuhlengwe abantu emhlabeni jikelele.
Abezempilakahle emhlabeni jikelele bamukele umbiko wePfizer lo ngezandla zombili lanxa nje besithi umuthi lo ulakho ukuthatha isikhathi eside ukuthi ufike ebantwini alubana uthe wapasiswa nguhulumende weMelika.